وفاقی آئینی عدالتِ پاکستان میں قائم مقام چیف جسٹس کی تقرری کے بعد جسٹس سید حسن اظہر رضوی نے اپنے نئے منصب کا حلف اٹھا لیا۔ چیف جسٹس امین الدین خان کے بیرون ملک دورے کے باعث جسٹس سید حسن اظہر رضوی کو قائم مقام چیف جسٹس کی ذمہ داریاں سونپی گئی ہیں۔
وفاقی آئینی عدالتِ پاکستان میں حلف برداری کی باوقار تقریب منعقد ہوئی جہاں جسٹس عامر فاروق نے جسٹس سید حسن اظہر رضوی سے قائم مقام چیف جسٹس کے منصب کا حلف لیا۔
حلف برداری کی تقریب میں وفاقی آئینی عدالت کے فاضل ججز رجسٹرار اور دیگر اعلیٰ افسران کے علاوہ وزارت قانون و انصاف سپریم کورٹ بار ایسوسی ایشن اور پاکستان بار کونسل کے معزز عہدیداران نے بھی شرکت کی۔
حلف اٹھانے کے بعد جسٹس سید حسن اظہر رضوی نے وفاقی آئینی عدالتِ پاکستان کے قائم مقام چیف جسٹس کی حیثیت سے اپنی ذمہ داریاں باضابطہ طور پر سنبھال لیں۔ ان کی تقرری کا مقصد چیف جسٹس امین الدین خان کی بیرون ملک موجودگی کے دوران عدالت کے عدالتی اور انتظامی امور کا تسلسل برقرار رکھنا ہے۔
جسٹس سید حسن اظہر رضوی کی جانب سے ذمہ داریاں سنبھالنے کے بعد وفاقی آئینی عدالت کے معمول کے عدالتی امور بلا تعطل جاری رہیں گے جبکہ آئینی مقدمات کی سماعت اور دیگر انتظامی معاملات بھی معمول کے مطابق آگے بڑھائے جائیں گے۔
وفاقی آئینی عدالت کے مطابق قائم مقام چیف جسٹس کی ذمہ داریاں سنبھالنے کا یہ انتظام ادارے کے عدالتی و انتظامی تسلسل کو برقرار رکھنے کے لیے کیا گیا ہے تاکہ چیف جسٹس کی عدم موجودگی کے دوران بھی آئینی انصاف کی فراہمی کے عمل میں کسی قسم کا تعطل پیدا نہ ہو۔
