مزار قائد اور اطراف میں جلسے جلوس کے حوالے سے سندھ حکومت کا بڑا فیصلہ

کراچی میں امن و امان کی صورتحال کے پیش نظر انتظامیہ نے مزار قائد اور اس کے اطراف جلسے، جلوس، ریلی اور احتجاجی اجتماعات پر پابندی برقرار رکھنے کا فیصلہ کیا ہے۔ ضلعی انتظامیہ نے واضح کیا ہے کہ مزار قائد کے اطراف کسی بھی غیر مجاز اجتماع کی اجازت نہیں ہوگی، جبکہ پابندی کی خلاف ورزی کرنے والوں کے خلاف قانون کے مطابق کارروائی کی جائے گی۔

ضلع شرقی کی انتظامیہ کے مطابق مزار قائد ملک کا ایک اہم قومی اور تاریخی مقام ہے جس کے تقدس کو برقرار رکھنا انتظامیہ کی ذمہ داری ہے۔ اسی تناظر میں مزار قائد کے اطراف کسی بھی قسم کے جلسے، جلوس یا ریلی کے انعقاد کی اجازت نہیں دی جائے گی۔ حکام نے شہریوں اور متعلقہ حلقوں کو ہدایت کی ہے کہ وہ انتظامیہ کی جانب سے جاری کردہ پابندی کی پاسداری کریں تاکہ شہر میں امن و امان کی صورتحال کو برقرار رکھا جا سکے۔

 یہ بھی پڑھیں :پی ٹی آئی کا مردان جلسہ یا عوام کے لیے عذاب؟ خاردار تاریں، بند سڑکیں اور سیل شدہ کاروباری مراکز نے شہریوں کو رُلا دیا

ڈپٹی کمشنر ضلع شرقی کا کہنا ہے کہ مزار قائد کے اطراف کسی بھی قسم کے اجتماع کے لیے اجازت موجود نہیں۔ انہوں نے خبردار کیا کہ اگر اجازت کے بغیر کوئی اجتماع منعقد کیا گیا تو قانون کے مطابق کارروائی عمل میں لائی جائے گی۔ انتظامیہ کے مطابق مزار قائد کے تقدس سے متعلق قانون کے تحت مزار کے احاطے میں جلسہ، مظاہرہ اور جلوس کی اجازت نہیں ہے۔

حکام کا کہنا ہے کہ موجودہ سکیورٹی صورتحال کے پیش نظر حساس مقامات پر اضافی انتظامات کیے جا رہے ہیں۔ انتظامیہ کی جانب سے کوشش کی جا رہی ہے کہ کسی بھی ممکنہ ناخوشگوار واقعے سے قبل ضروری اقدامات مکمل کیے جائیں اور شہریوں کی جان و مال کے تحفظ کو یقینی بنایا جائے۔

دوسری جانب کراچی میں سکیورٹی اقدامات کے باعث متعدد اہم شاہراہوں پر ٹریفک کی روانی بھی متاثر ہوئی ہے۔ ٹریفک پولیس کے مطابق نیو ایم اے جناح روڈ اور کوریڈور تھری کو ٹریفک کے لیے بند کیا گیا ہے، جبکہ ایم اے جناح روڈ کے دونوں اطراف بھی ٹریفک کی آمدورفت متاثر ہے۔

 یہ بھی پڑھیں :سیاسی پاور کے لیے ’اسٹریٹ موومنٹ‘ شو فلاپ، سہیل آفریدی کا دورہ کراچی بری طرح ناکام، عوام نے منہ موڑ لیا

گرومندر سے نمائش چورنگی جانے والی سڑک اور سیون ڈے اسپتال سے نمائش چورنگی جانے والا راستہ بھی بند ہے۔ ٹریفک پولیس نے شہریوں کو ہدایت کی ہے کہ وہ غیر ضروری طور پر ان علاقوں کا رخ کرنے سے گریز کریں اور سفر کے دوران متبادل راستے اختیار کریں تاکہ ٹریفک کے دباؤ میں کمی لائی جا سکے۔