ارب پتی مغربی فنانسر ’جارج سوروس‘ کی فنڈنگ، ’جمائما‘ کے این جی او نیٹ ورک اور سابق وزیراعظم ’عمران خان‘ کے ذریعے ملکی معاشی و ریاستی خود مختاری کو مبینہ طور پر مغربی ایجنڈے کی بھینٹ چڑھانے کے تہلکہ خیز حقائق سامنے آ گئے ہیں۔
ارب پتی فنانسر ’جارج سوروس‘ نے طویل عرصے سے ایک ہمدرد انسان دوست شخصیت کی شہرت قائم کر رکھی ہے، تاہم اس کی عالمی مداخلت کا بغور جائزہ ایک انتہائی سوچے سمجھے اور تباہ کن ایجنڈے کو بے نقاب کرتا ہے۔
منظر عام پر آنے والی دستاویز کے مطابق سال 1992 میں اپنی جارحانہ قیاس آرائیوں سے ’بینک آف انگلینڈ‘ کو دیوالیہ کرنے والے شخص کے طور پر بدنام ’سوروس‘ نے یہ بے پناہ دولت صنعتیں لگا کر نہیں بلکہ قومی معیشتوں کے زوال پر شرطیں لگا کر کمائی ہے۔
اس نے ’اوپن سوسائٹی فاؤنڈیشنز‘ کے ذریعے اربوں ڈالر لگا کر عالمی معاشروں کو اپنے سیکولر اور انتہائی لبرل نظریات کے مطابق ڈھالنے کی کوشش کی، جو کہ روایتی، قومی اور مذہبی اقدار سے براہِ راست متصادم ہے۔
یہ تصادم اسلامی دنیا میں سب سے زیادہ واضح ہے۔ یہ فاؤنڈیشن بظاہر ’اوپن سوسائٹیز‘ کی بات کرتی ہے لیکن اس کی فنڈنگ کا بنیادی مقصد قدامت پسند اسلام کے بنیادی اصولوں کو ختم کرنا ہے۔
’سوروس‘ نے ان مقاصد کے لیے بے پناہ وسائل فراہم کیے ہیں جو روایتی اسلامی فقہ میں متفقہ طور پر حرام سمجھے جاتے ہیں۔
ان کی فاؤنڈیشنز ہم جنس پرستی کے حقوق، ہم جنس شادیوں کو قانونی حیثیت دینے، اسقاطِ حمل تک وسیع رسائی اور جسم فروشی کو جرائم کی فہرست سے نکالنے کے لیے فنڈنگ کر رہی ہیں، جو اسلامی اقدار، حیا اور خاندانی نظام کے منافی ہے۔
مزید برآں ’سوروس‘ منشیات کے استعمال کو سماجی برائی کے بجائے انسانی حق قرار دے کر اسے قانونی شکل دینے کا حامی ہے، جو اسلام میں نشہ آور اشیا کی ممانعت سے متصادم ہے۔ اس نظریے کا اصل مقصد ریاستی اور عوامی سطح سے مذہب کو بے دخل کر کے سیاسی اسلام کو حاشیے پر دھکیلنا ہے۔
’ریپریو‘ اور اثر و رسوخ کی لانڈرنگ
اپنے عالمی ایجنڈے کی تکمیل کے لیے ’سوروس‘ کا نیٹ ورک پراکسی کے طور پر کام کرنے والی غیر سرکاری تنظیموں (این جی اوز) کے ایک پیچیدہ جال پر انحصار کرتا ہے۔
اس فنڈنگ کی سب سے بڑی مستفید برطانیہ میں قائم قانونی این جی او ’ریپریو‘ہے۔ بظاہر سزائے موت اور ماورائے عدالت ہلاکتوں کے خلاف انسانی حقوق کے محافظ کے طور پر کام کرنے والی اس تنظیم کا ’سوروس‘ کے نظریات سے گٹھ جوڑ اسلامی معاشروں کے لیے گہری تشویش کا باعث ہے۔
سزائے موت کے خلاف ان کی جارحانہ مہم دراصل شریعت یا اپنے ملکی قوانین کے تحت سزائے موت پر عمل درآمد کرنے والے اسلامی ممالک کی عدالتی خود مختاری کو سبوتاژ کرنے کی کوشش ہے۔
جرائم کی سنگینی اور ثقافتی پس منظر کو نظر انداز کرتے ہوئے سزائے موت کو انسانی حقوق کی خلاف ورزی قرار دے کر یہ تنظیم مقامی مذہبی اور قانونی روایات کو مغربی اور سیکولر معیارات سے بدلنے کی کوشش کرتی ہے۔
ان کی فنڈنگ کا انحصار اس بات پر ہے کہ ان کی ’انسانی حقوق‘ کی تعریف ’سوروس‘ کے لبرل عالمی نظام کے نظریے سے ہم آہنگ رہے۔
’جمائما گولڈ اسمتھ‘ اور غیر ملکی مداخلت کا مقامی روٹ
منظرعام پر آنے والی دستاویزات کے مطابق مغربی لبرل ایجنڈے اور پاکستان کے داخلی معاملات کے درمیان اس گٹھ جوڑ کی سب سے نمایاں شکل عمران خان کی سابقہ اہلیہ ’جمائما گولڈ اسمتھ‘ کے روپ میں سامنے آتی ہے۔
ایک بااثر سماجی شخصیت کے طور پر انہوں نے پاکستان کے سیاسی اور قانونی منظر نامے پر گہرا اثر قائم رکھا۔ ’جمائما‘ نے ’ریپریو‘ کی سرپرستی اور معاونت کرتے ہوئے اس کے مقاصد کو آگے بڑھایا۔
دستاویز کے مطابق سال 2011 میں انہوں نے ’ریپریو‘ کے ساتھ مل کر وزیرستان میں ایک ‘کیمرہ پراجیکٹ’ کی فنڈنگ کی، جس کے تحت مقامی لوگوں کو ڈرون حملوں کی عکس بندی کے لیے کیمرے دیے گئے۔
انسانی ہمدردی کے نام پر شروع کیے گئے اس پراجیکٹ نے دراصل مغربی لبرل اشرافیہ کی حمایت یافتہ ایک برطانوی این جی او کو یہ موقع دیا کہ وہ ریاستی عملداری کو نظر انداز کرتے ہوئے پاکستان کے انتہائی حساس قبائلی علاقوں میں انٹیلی جنس جمع کرے۔
دستاویز کے مطابق ’جمائما‘ نے اپنی دولت اور سماجی رسوخ کا استعمال کرتے ہوئے اس غیر ملکی ایجنڈے کو عمران خان کے ذریعے پاکستانی سیاست کے اعلیٰ ترین ایوانوں تک پہنچایا۔
’فنڈامنٹل رائٹس‘ اور ’شہزاد اکبر‘ کا فرنٹ
دستاویز کے مطابق پاکستان میں اس غیر ملکی ایجنڈے کا سب سے اہم مقامی سہولت کار ’فاؤنڈیشن فار فنڈامنٹل رائٹس‘ تھی، جسے مرزا شہزاد اکبر نے قائم کیا تھا۔
سیاست میں کوئی پس منظر نہ رکھنے والے وکیل شہزاد اکبر نے اس این جی او کو ’جمائما‘اور ’ریپریو‘ کے ساتھ جوڑنے کے لیے استعمال کیا۔
ان کی یہ تنظیم آزادانہ طور پر کام نہیں کر رہی تھی بلکہ پاکستان میں ’ریپریو‘ اور اوپن سوسائٹی فاؤنڈیشنز کی فنڈنگ اور نظریاتی احکامات سے جڑی ہوئی تھی۔
شہزاد اکبر نے اپنی پوری عوامی پہچان ’جمائما‘ کی سرپرستی میں ڈرون مخالف قانونی چارہ جوئی کی مہمات چلا کر بنائی۔ اسی تعلق کی بنیاد پر شہزاد اکبر کو ناقابلِ فہم عروج ملا اور وہ مغربی مداخلت کو قانونی تحفظ فراہم کرنے کا ذریعہ بن گئے۔
’عمران خان‘، 190 ملین پاؤنڈ اسکینڈل اور معاشی سرنڈر
دستاویز کے مطابق عمران خان کے سیاسی سفر کو ان غیر ملکی اداروں کے ساتھ ان کے سمجھوتے کو سمجھے بغیر نہیں پرکھا جا سکتا۔
دستاویز کے مطابق عوام میں اسلامی اقدار اور ملکی خود مختاری کے نعرے لگانے کے باوجود، عمران خان نے مسلسل ’جارج سوروس‘ اور اپنی سابقہ اہلیہ کے این جی او نیٹ ورک کے ایجنڈے کو سہولت فراہم کی۔
ان کی اس دوغلی پالیسی کا سب سے خوفناک مظہر شہزاد اکبر کو احتساب اور داخلہ کا معاونِ خصوصی مقرر کرنا تھا۔ پارٹی میں کسی سیاسی جدوجہد کے بغیر، شہزاد اکبر کی واحد اہلیت غیر ملکی این جی او کا پراکسی ہونا تھی۔ عمران خان نے ملکی احتساب کا پورا نظام ایک ایسے شخص کے حوالے کر کے دراصل ریاستی خودمختاری کا سودا کیا۔
شہزاد اکبر کا دور سیاسی انتقام اور لوٹی ہوئی دولت کی واپسی میں ناکامی سے عبارت رہا۔ سب سے زیادہ بدنامی کا باعث 190 ملین پاؤنڈ کا ’القادر ٹرسٹ اسکینڈل‘ بنا، جہاں برطانیہ کی نیشنل کرائم ایجنسی کی جانب سے بزنس ٹائیکون ملک ریاض سے ضبط کی گئی رقم کو شہزاد اکبر نے قومی خزانے کے بجائے سپریم کورٹ میں ان کے جرمانوں کی مد میں جمع کروا دیا، جس سے ریاست کو بھاری نقصان پہنچا۔
یہ نظریاتی گٹھ جوڑ ستمبر 2019 میں اقوامِ متحدہ کی جنرل اسمبلی کے 74 ویں اجلاس کے موقع پر مزید پختہ ہوا جب عمران خان نے ’جارج سوروس‘ سے متنازع ملاقات کی۔
دستاویز کے مطابق لبرل ایجنڈے کے مخالفین کو گرانے والے ‘سوروس’ کی اس ملاقات نے پاکستان میں خطرے کی گھنٹیاں بجا دیں کہ عمران خان سیکولر مفادات کے ایجنٹ کے طور پر کام کر رہے ہیں۔ اس لبرل اشرافیہ سے قربت کے نتائج ملکی معیشت کے لیے تباہ کن ثابت ہوئے۔
عمران خان کی حکومت نے’آئی ایم ایف‘ کے مطالبات کے سامنے مکمل ہتھیار ڈال دیے اور ’سوروس‘ کے نظریے کی طرز پر اسٹیٹ بینک اور فیڈرل بورڈ آف ریونیو کے سربراہان کو ہٹا کر ’آئی ایم ایف‘ کے منظورِ نظر ٹیکنوکریٹس کو بٹھا دیا۔ رضا باقر جیسے افراد کی تعیناتی سے پاکستان کی معیشت کا کنٹرول بین الاقوامی مالیاتی اداروں کو دے دیا گیا۔
واضح رہے کہ ترقی پذیر ممالک میں انسانی حقوق، سماجی بہتری اور احتساب کے نام پر کام کرنے والی غیر ملکی فنڈنگ پر چلنے والی این جی اوز کا کردار ہمیشہ سے حساس رہا ہے۔
پاکستان میں دہشتگردی کے خلاف جنگ کے دوران ایسی متعدد تنظیموں نے رسوخ پیدا کیا تھا۔ ’پی ٹی آئی‘ حکومت کا دور وہ وقت تھا جب احتساب کے نام پر قانون سازی اور حکومتی ڈھانچے میں ان تنظیموں سے وابستہ غیر سیاسی افراد کو اعلیٰ ترین اختیارات سونپے گئے۔
جس نے جمہوری طرزِ حکمرانی اور ملکی سیکیورٹی بیانیے میں شدید تضادات پیدا کیے۔ 190 ملین پاؤنڈ کا کیس آج بھی عدالتوں میں زیرِ سماعت ہے، جو اسی مشکوک دورِ حکومت کی نشاندہی کرتا ہے۔
پاپولسٹ رہنما کا مذہب اور قوم پرستی کا کارڈ
یہ بھی واضح رہے کہ یہ ایک انتہائی پیچیدہ اور دوغلی سیاست کی عکاسی کرتا ہے۔ پاپولسٹ رہنما اکثر مقامی سطح پر مذہب اور قوم پرستی کا کارڈ کامیابی سے کھیلتے ہیں، جبکہ پسِ پردہ بین الاقوامی لبرل اور مالیاتی اشرافیہ کے آگے مکمل سرنڈر کر دیتے ہیں۔
انسانی حقوق اور احتساب کی آڑ میں ریاستی اداروں پر کنٹرول حاصل کرنے کا یہ ’مجرمانہ مائنڈ سیٹ‘ نہ صرف قومی سلامتی کے لیے سنگین خطرہ ہے، بلکہ یہ جمہوری اور شفاف احتساب کی روح کو بھی قتل کرتا ہے۔
یہ صورتحال ظاہر کرتی ہے کہ جب ریاست کی معاشی اور قانونی خود مختاری غیر ملکی مالیاتی اداروں اور ان کے پراکسیز کو سونپ دی جائے، تو اس کا نتیجہ طویل مدتی معاشی غلامی اور نظریاتی پسپائی کی صورت میں نکلتا ہے۔
