حکومت نے گھی اور کوکنگ آئل کی تین قیمتیں مقرر کر دیں،تفصیلات جاری

وفاقی بورڈ آف ریونیو (ایف بی آر) نے مقامی طور پر تیار ہونے والے گھی اور کوکنگ آئل پر سیلز ٹیکس کے درست تعین کے لیے ستمبر 2026 کی کم از کم قابلِ ٹیکس قیمتیں مقرر کردی ہیں۔ نئے طریقہ کار کے تحت گھی اور کوکنگ آئل کے مختلف برانڈز کے لیے کم از کم قیمت 500 سے 588 روپے فی کلوگرام یا لیٹر مقرر کی گئی ہے۔

ایف بی آر نے اس حوالے سے ایس آر او 1632(I)/2026 جاری کیا ہے، جس کا مقصد گھی اور کوکنگ آئل کی فروخت میں کم قیمت ظاہر کرکے ٹیکس سے بچنے، انڈر انوائسنگ اور ٹیکس کے غلط تعین کے امکانات کو محدود کرنا ہے۔ نوٹیفکیشن 18 ستمبر 2026 کو جاری کیا گیا۔

نوٹیفکیشن کے مطابق گھی، کوکنگ آئل اور سبزیوں و حیوانی چکنائیوں اور تیل کی کم از کم قابلِ ٹیکس قیمت پاکستان بیورو آف اسٹیٹسٹکس (پی بی ایس) کے ہفتہ وار حساس قیمت اشاریے (SPI) میں درج قومی اوسط خوردہ قیمت کی بنیاد پر مقرر کی جائے گی۔ اس مقصد کے لیے گزشتہ ماہ کے آخری ہفتے میں شائع ہونے والی اوسط قومی خوردہ قیمت کو بنیاد بنایا جائے گا۔

ایف بی آر نے ڈیجیٹل انوائسنگ اور پیداواری نگرانی کے نظام پر عمل کرنے والے رجسٹرڈ کاروباری اداروں کے لیے فی کلوگرام 25 روپے کی رعایت بھی مقرر کی ہے۔ یعنی مقررہ شرائط پوری کرنے والے رجسٹرڈ افراد کے لیے قابلِ اطلاق بنیادی قیمت میں 25 روپے فی کلوگرام کمی کی سہولت دستیاب ہوگی۔

ایف بی آر نے گھی اور کوکنگ آئل کے برانڈز کو تین کیٹیگریز میں تقسیم کیا ہے۔ کیٹیگری اے میں ڈالڈا، حبیب، صوفی، میزان، سویا سپریم اور ایوا شامل ہیں اور ان کے لیے کم از کم قابلِ ٹیکس قیمت مقررہ بنیادی قیمت کا 100 فیصد ہوگی۔

یہ بھی پڑھیں:سپیکر قومی اسمبلی نے عمران خان سے ملاقاتوں سے متعلق بڑا راز کھول دیا

کیٹیگری بی میں من پسند، حبیب ہانڈی، سیزنز، کشمیر، کوثر، شاہ تاج، کسان، شفق اور سلطان سمیت برانڈز شامل ہیں، جن کے لیے کم از کم قیمت بنیادی قیمت کے 93 فیصد کے برابر رکھی گئی ہے۔

کیٹیگری سی میں دیگر تمام برانڈز شامل کیے گئے ہیں اور ان کے لیے کم از کم قیمت بنیادی قیمت کے 85 فیصد کے برابر مقرر کی گئی ہے۔

ستمبر 2026 کے لیے ایف بی آر نے کیٹیگری اے کی کم از کم قابلِ ٹیکس قیمت 588 روپے فی کلوگرام یا لیٹر، کیٹیگری بی کی 547 روپے جبکہ کیٹیگری سی کی 500 روپے فی کلوگرام یا لیٹر مقرر کی ہے۔

ایف بی آر کے طریقہ کار کے مطابق بنیادی اوسط قیمت پاکستان بیورو آف اسٹیٹسٹکس کے اعداد و شمار سے حاصل کی جاتی ہے۔ نوٹیفکیشن میں دی گئی مثال کے مطابق مختلف پیک سائز کی قیمتوں کی بنیاد پر اوسط قیمت 613 روپے بنتی ہے، جس میں مقررہ شرائط پوری کرنے والے رجسٹرڈ کاروباری اداروں کے لیے 25 روپے کی کمی کے بعد 588 روپے کی بنیادی قیمت سامنے آتی ہے۔

ایف بی آر نے واضح کیا ہے کہ یہ مقررہ اعداد مارکیٹ میں گھی یا کوکنگ آئل کی لازمی فروختی قیمت قرار نہیں دیے گئے بلکہ سیلز ٹیکس کے حساب کے لیے کم از کم قدر ہیں۔ اگر کسی گھی یا کوکنگ آئل کی اصل فروخت مقررہ کم از کم قدر سے زیادہ قیمت پر ہوتی ہے تو سیلز ٹیکس زیادہ یعنی اصل فروختی قیمت پر عائد کیا جائے گا۔

مسلح افواج کو گھی اور کوکنگ آئل کی فراہمی کے معاملے میں نوٹیفکیشن کے مطابق متعلقہ معاہدے میں درج قیمت کو بنیاد بنایا جائے گا۔

ایف بی آر کے اس اقدام کا بنیادی مقصد ٹیکس کے دائرے میں آنے والی اشیا کی قدر کے تعین میں یکسانیت پیدا کرنا اور کم قیمت ظاہر کرکے سیلز ٹیکس کی ذمہ داری کم کرنے کے امکانات کو روکنا ہے۔ نئے طریقہ کار میں مارکیٹ کی اوسط قیمت کو بنیاد بنانے سے ٹیکس کے لیے مقرر کردہ کم از کم قدر کو مارکیٹ کے تازہ اعداد و شمار سے منسلک کردیا گیا ہے۔

اہم بات یہ ہے کہ یہ قیمتیں ستمبر کے لیے مقرر کی گئی ہیں اور آئندہ مہینوں میں بھی اسی طریقہ کار کے تحت نئی کم از کم اقدار کا تعین کیا جائے گا۔ ایس آر او 1632(I)/2026 کے تحت یہ انتظام نومبر 2026 کی ٹیکس مدت تک نافذ العمل رہے گا۔

یوں گھی اور کوکنگ آئل کے کاروبار سے وابستہ افراد کو اپنی سیلز ٹیکس ادائیگی کے لیے متعلقہ برانڈ کی کیٹیگری، ایف بی آر کی مقرر کردہ کم از کم قدر، ڈیجیٹل انوائسنگ اور پروڈکشن مانیٹرنگ کی شرائط اور اصل فروختی قیمت کو مدنظر رکھنا ہوگا۔