پاکستان نیوی کی بڑی کارروائی، 75 کروڑ ڈالر مالیت کی منشیات پکڑ لی

پاکستان نیوی کے جہازوں نے عرب سمندر میں مشترکہ اینٹی نارکوٹکس آپریشن کے دوران 2 ہزار 800 کلوگرام سے زائد منشیات قبضے میں لے لی ہیں، پکڑی گئی منشیات کی عالمی مارکیٹ میں مالیت تقریباً 75 کروڑ ڈالر بتائی گئی ہے۔

پاکستان نیوی کے جہاز ہُنَین اور یرموک نے معمول کی گشت کے دوران ایک مشتبہ کشتی کو روکا اور تلاشی کے لیے اس میں سوار ہوئے۔ کارروائی کے دوران کشتی کے خفیہ خانوں میں چھپائی گئی بھاری مقدار میں منشیات برآمد کی گئی۔ یہ کارروائی سمندر میں منشیات کی غیر قانونی نقل و حمل کے خلاف مشترکہ آپریشن کے تحت کی گئی۔

ذرائع کے مطابق نیول جہازوں نے مشتبہ کشتی کی نگرانی کے بعد اسے روکا اور بورڈنگ آپریشن کے ذریعے کشتی کے مختلف حصوں کی تلاشی لی۔ تلاشی کے دوران منشیات خفیہ کمپارٹمنٹس میں چھپائی گئی تھیں، جنہیں برآمد کرکے قبضے میں لے لیا گیا۔

پاکستان نیوی کی جانب سے کارروائی کی تفصیلات میں منشیات کی مختلف اقسام یا کشتی کی شناخت کے بارے میں مزید معلومات فوری طور پر جاری نہیں کی گئیں، تاہم مجموعی مقدار 2 ہزار 800 کلوگرام سے زائد اور مالیت تقریباً 750 ملین امریکی ڈالر بتائی گئی ہے۔

یہ بھی پڑھیں:فیلڈ مارشل عاصم منیر اور سعودی وزیر دفاع کی اہم ملاقات، بڑے معاملات پر تبادلہ خیال

پاکستان نیوی کے ترجمان کے مطابق اس کامیاب کارروائی سے سمندری راستے سے منشیات کی غیر قانونی ترسیل کے خلاف پاکستان نیوی کی نگرانی اور آپریشنل صلاحیت کا اظہار ہوتا ہے۔ سمندری حدود میں منشیات کی اسمگلنگ نہ صرف قومی سلامتی بلکہ خطے کی بحری سلامتی کے لیے بھی ایک اہم چیلنج سمجھی جاتی ہے۔

چیف آف دی نیول اسٹاف ایڈمرل نوید اشرف، نشانِ امتیاز، نشانِ امتیاز (ملٹری)، تمغۂ بسالت نے کارروائی میں حصہ لینے والے افسران اور جوانوں کی پیشہ ورانہ مہارت، چوکسی اور مستعدی کو سراہا۔ انہوں نے سمندری سلامتی برقرار رکھنے اور سمندری راستوں سے غیر قانونی منشیات کی نقل و حمل کے خلاف پاکستان نیوی کے عزم کا اعادہ کیا۔

یہ پہلا موقع نہیں کہ پاکستان نیوی نے عرب سمندر میں بڑے پیمانے پر منشیات کی اسمگلنگ کے خلاف کارروائی کی ہو۔ گزشتہ برس بھی پاکستان نیوی کے جہاز یرموک نے مشترکہ میری ٹائم فورسز کے تحت کارروائی کرتے ہوئے بڑی مقدار میں منشیات قبضے میں لی تھیں، جبکہ حالیہ دنوں میں پاکستان نیوی اور پاکستان کوسٹ گارڈز نے بلوچستان کے علاقے پشکان میں بھی ایک مشترکہ کارروائی کے دوران بڑی مقدار میں ممنوعہ اشیا اور غیر قانونی ادویات ضبط کی تھیں۔

حالیہ کارروائی ایک ایسے وقت میں سامنے آئی ہے جب سمندری راستوں سے منشیات اور دیگر غیر قانونی اشیا کی نقل و حمل کے خلاف علاقائی سطح پر نگرانی اور مشترکہ کارروائیوں پر توجہ بڑھ رہی ہے۔ پاکستان نیوی کی جانب سے بھی سمندری حدود کی نگرانی، غیر قانونی سرگرمیوں کی روک تھام اور قومی و علاقائی بحری مفادات کے تحفظ کے لیے کارروائیاں جاری رکھنے کے عزم کا اظہار کیا گیا ہے۔

صدر مملکت آصف علی زرداری اور وزیراعظم شہباز شریف نے بھی کامیاب اینٹی نارکوٹکس آپریشن پر پاکستان نیوی کو سراہا ہے۔