واٹس ایپ کا نیا فیچر، اب دوستوں کی سالگرہ بھولنے کی فکر نہیں

واٹس ایپ صارفین کے لیے ایک ایسے نئے فیچر کی آزمائش کر رہا ہے جس کی مدد سے دوستوں اور اہل خانہ کی سالگرہ یاد رکھنا آسان ہوجائے گا۔

میڈیا رپورٹس کے مطابق واٹس ایپ کے آئی او ایس ورژن میں ایک نئے کانٹیکٹس ٹیب پر کام جاری ہے، جہاں صارفین کو اپنے محفوظ کردہ رابطوں کی سالگرہ سے متعلق یاد دہانیاں دکھائی جا سکتی ہیں۔

اس فیچر کے ذریعے اگر کسی محفوظ کانٹیکٹ کی سالگرہ ہو تو اس شخص کے نام کے ساتھ کیک کا ایموجی اور برتھ ڈے ٹوڈے کا پیغام دکھایا جا سکتا ہے۔ یہ یاد دہانی دن بھر نمایاں رہنے کی توقع ہے تاکہ صارف بروقت اپنے دوست یا عزیز کو سالگرہ کی مبارک باد دے سکیں۔

یہ بھی پڑھیں:اوپن اے آئی کے اے آئی ایجنٹس امریکی سرکاری ویب سائٹس تک پہنچ گئے

فون میں محفوظ معلومات استعمال ہوں گی

ممکنہ طور پر واٹس ایپ صارف کے فون کی کانٹیکٹس ایپ میں پہلے سے محفوظ سالگرہ کی معلومات استعمال کرے گا۔ اس صورت میں صارفین کو واٹس ایپ پر الگ سے سالگرہ کی فہرست بنانے کی ضرورت نہیں پڑے گی۔

واٹس ایپ کے ڈیزائن میں بھی تبدیلی

رپورٹس کے مطابق واٹس ایپ کے نئے نیویگیشن ڈیزائن میں موجودہ اپ ڈیٹس ٹیب کی جگہ کانٹیکٹس ٹیب شامل کیا جا رہا ہے، جبکہ اسٹیٹس اپ ڈیٹس اور چینلز کو چیٹس سیکشن میں منتقل کیے جانے کا امکان ہے۔ فی الحال یہ فیچر آزمائشی مرحلے میں ہے اور واٹس ایپ نے اس کی حتمی شکل یا تمام صارفین کے لیے دستیابی کی تاریخ کا باضابطہ اعلان نہیں کیا۔