ایل این جی کی قیمت میں بڑی کمی، گیس صارفین کے بلوں پر کیا اثر پڑے گا؟

ملکی معیشت اور توانائی کے شعبے کے لیے ایک انتہائی مثبت خبر سامنے آئی ہے، جہاں سوئی ناردرن گیس کمپنی کے سسٹم پر آر ایل این جی (RLNG) کی قیمتوں میں نمایاں کمی ریکارڈ کی گئی ہے۔ 

سوئی ناردرن گیس کمپنی کے سسٹم پر ایل این جی کی قیمتوں میں کمی ہونے سے کمپنی میں ایل این جی پر نصب کنکشنز کے بلوں میں کمی ہونے کا امکان ہے۔

قیمتوں میں کتنی کمی ہوئی ؟

میڈیا رپورٹ کے مطابق ذرائع کا بتانا ہے کہ  ایل این جی کی قیمت میں فی ایم ایم بی ٹی یو (MMBTU) کی بنیاد پر تقریباً 1000 روپے کی بڑی کمی واقع ہوئی ہے۔

اعداد و شمار پر نظر ڈالی جائے تو رواں ماہ ایل این جی پر صارفین کے لیے بلنگ ریٹ کم ہو کر 4200 روپے مقرر کیا گیا ہے، جبکہ اس کے برعکس گزشتہ ماہ یہی قیمت ریکارڈ سطح پر 5200 روپے فی ایم ایم بی ٹی یو مقرر تھی ، قیمت میں ایک ہی ماہ کے اندر ایک ہزار روپے کی یہ کمی صارفین کے لیے ایک بہت بڑا ریلیف ہے۔

قیمتوں میں اضافے کی اصل وجہ کیا تھی؟

گزشتہ مہینوں میں بین الاقوامی سطح پر پیدا ہونے والے سیاسی تناؤ، بالخصوص ایران اور امریکہ کے درمیان بڑھتی ہوئی کشیدگی نے دنیا بھر میں توانائی کے سپلائی چین کو متاثر کیا تھا۔

یہ بھی پڑھیں :دنیا میں تیل کے ذخائر خطرناک حد تک کم ہونے لگے ، آرامکو سربراہ نے خبردار کردیا

اس کشیدگی کی وجہ سے ایل این جی کی درآمد شدید متاثر ہوئی اور جب طلب کے مقابلے میں رسد کم ہوئی تو پاکستان سمیت عالمی مارکیٹ میں ایل این جی کی قیمتوں میں ریکارڈ اضافہ دیکھنے میں آیا ،  اسی بحران کے نتیجے میں صارفین کو گزشتہ ماہ انتہائی بھاری بھرکم اور ہوشربا بلز موصول ہوئے تھے جن کی ادائیگی عام شہریوں کے لیے ناممکن ہوتی جا رہی تھی۔

صارفین کے بلوں پر اس کے کیا اثرات ہوں گے؟

سوئی ناردرن گیس کمپنی کے سسٹم پر ایل این جی کی قیمتوں میں اس خاطر خواہ کمی کے بعد اب یہ قوی امکان ظاہر کیا جا رہا ہے کہ متعلقہ کنکشنز رکھنے والے صارفین کے ماہانہ بلوں میں نمایاں کمی ہوگی۔

صنعتوں اور تجارتی یونٹس کے ساتھ ساتھ اس نظام سے وابستہ گھریلو صارفین کو بھی اس کے اچھے نتائج ملیں گے۔ یہ کمی نہ صرف صنعتی پیداواری لاگت کو کم کرے گی بلکہ عام صارف کو بھی مالی مشکلات سے نکالنے میں مددگار ثابت ہوگی۔