ایف آئی اے کا غیر قانونی کرنسی کاروبار اور حوالہ ہنڈی کے خلاف تاریخ کا سب سے کامیاب آپریشن

پشاور میں ایف آئی اے نے ملک کی تاریخ میں غیر قانونی کرنسی کاروبار اور حوالہ ہنڈی کے خلاف بڑی کارروائی کی ہے۔

تفصیلات کے مطابق ایف آئی اے نے اندرون شہر کے مشہور صرافہ بازار میں چھاپہ مار کر ایک ملزم سے 23 کروڑ روپے نقد برآمد کیے ہیں۔ ایف آئی اے کے ڈپٹی ڈائریکٹر نعیم خان کے مطابق یہ کارروائی غیر قانونی کرنسی ایکسچینج اور ہنڈی حوالہ کے کاروبار میں ملوث ایک اہم ملزم عطاء اللہ کے خلاف کی گئی۔

انہوں نے بتایا کہ کرنسی کو ملزم کی دکان کے خفیہ خانوں میں چھپایا گیا تھا، جسے ایف آئی اے نے بازیاب کر لیا۔ یہ کارروائی ایف آئی اے کی اب تک کی سب سے بڑی کامیابی ہے، اور اس میں ملزم عطاء اللہ کو گرفتار کر لیا گیا ہے۔ ملزم سے تفتیش کے دوران یہ بات سامنے آئی کہ غیر قانونی کرنسی زیادہ تر افغانستان سے بھیجی جارہی تھی۔

ڈپٹی ڈائریکٹر ایف آئی اے نے مزید بتایا کہ اس کارروائی کے دوران ایک ہفتہ تک ریکی کی گئی تھی، تاکہ مکمل معلومات حاصل کی جا سکیں۔ اس کے علاوہ، ایف آئی اے نے اس نیٹ ورک کے اصل سرغنہ خالد منظور کو گرفتار کرنے کے لیے مزید کارروائیاں جاری رکھی ہوئی ہیں۔ خالد منظور کو پہلے بھی گرفتار کیا جا چکا ہے، لیکن عدالت نے اسے رہا کر دیا تھا۔ وہ سونے کی اسمگلنگ میں بھی ملوث ہے اور ایف آئی اے کو اس کی تلاش ہے۔

ایف آئی اے حکام نے بتایا کہ غیر قانونی کرنسی ایکسچینج اور ہنڈی حوالہ کا کاروبار ملک کی معیشت کے لیے سنگین خطرات کا باعث ہے، کیونکہ یہ رقم دہشت گردی اور غیر قانونی سرگرمیوں میں استعمال ہو سکتی ہے۔

ان غیر قانونی طریقوں سے بھیجی جانے والی رقوم پہلے بھی دہشت گردوں کے ہاتھوں میں پہنچی ہیں، اور ایف آئی اے نے اس کاروبار کے خاتمے کے لیے اپنی کارروائیاں تیز کر دی ہیں۔

ایف آئی اے حکام کا کہنا ہے کہ ہر روز کہیں نہ کہیں ہنڈی حوالہ کے خلاف کارروائیاں کی جارہی ہیں، اور ادارہ اس غیر قانونی کاروبار کو ختم کرنے کے لیے مکمل طور پر متحرک ہے۔