اسلام آباد اور پنجاب کے کچھ شہروں میں اربن فلڈنگ کا خطرہ

نیشنل ڈیزاسٹر مینجمنٹ اتھارٹی (این ڈی ایم اے) نے خبردار کیا ہےکہ آئندہ 2 سے 6 گھنٹوں میں اسلام آباد اور پنجاب کے کچھ شہروں میں اربن فلڈنگ کا خطرہ موجود ہے۔

سوشل میڈیا سائٹ ’ایکس‘ پر ایک پوسٹ میں نیشنل ڈیزاسٹر مینجمنٹ اتھارٹی نے بتایا کہ آئندہ چند گھنٹوں کے دوران مری، گلیات، اسلام آباد، راولپنڈی، اٹک، چکوال اور جہلم میں اربن فلڈنگ ہو سکتی ہے۔

این ڈی ایم اے کے مطابق گزشتہ روز گرمی کی وجہ سے ’ٹاورنگ کومولس بادلوں‘ کا سسٹم بنا جو کہ آسمانی بجلی کے گرنے، گرج چمک اور موسلادھار بارش کا باعث بن سکتا ہے۔

اسلام آباد اور پنجاب کے شمالی علاقوں میں ممکنہ اربن فلڈنگ الرٹ/6 ستمبر:
اگلے2-6 گھنٹوں میں مری،گلیات،اسلام آباد، راولپنڈی،اٹک،چکوال،جہلم میں اربن فلڈنگ کا خطرہ۔گزشتہ روز گرمی کیوجہ سےٹاورنگ کومولس بادلوں کاسسٹم بناجوکہ آسمانی بجلی کے گرنے،گرج چمک، موسلادھار بارش کا باعث بن سکتاہے pic.twitter.com/c5fzVaNeKh

— NDMA PAKISTAN (@ndmapk) September 6, 2025

ادارے نے مزید کہا کہ پہاڑی علاقوں میں لینڈ سلائیڈنگ کا بھی امکان ہے، طوفانی بارش سے کمزور انفراسٹرکچر کو نقصان اور بجلی بند ہونے کا بھی اندیشہ ہے۔

یہ بھی پڑھیں : ملک میں بارشوں اور سیلاب سے جاں بحق افراد کی تعداد 907 ہوگئی

نیشنل ڈیزاسٹر مینجمنٹ اتھارٹی نے عوام سے درخواست کی کہ وہ درختوں، کمزور عمارتوں سے دور رہیں اور گاڑیوں کو محفوظ جگہ پر پارک کریں۔

ساتھ ہی شہریوں کو غیر ضروری سفر کرنے سے بھی گریز کرنے کی تلقین کی گئی ہے۔

دوسری جانب نیشنل ڈیزاسٹر مینجمنٹ اتھارٹی (این ڈی ایم اے) نے ملک بھر میں سیلاب اور بارشوں سے ہونے والے نقصانات کے اعداد و شمار جاری کر دیئے۔

یہ بھی پڑھیں : جنوبی پنجاب میں موسلادھار بارش کی پیشگوئی ، این ڈی ایم اے کا الرٹ جاری

ملک بھر کے مختلف مقامات پر بارشوں اور سیلابی صورتحال کے نتیجے میں جاں بحق افراد کی تعداد 907 تک پہنچ چکی ہے جبکہ ایک ہزار 44 زخمی ہوئے۔