محکمہ موسمیات نے ملک کے مختلف شہروں میں بادل برسنے کی پیشگوئی کر دی۔
محکمہ موسمیات کے مطابق ملک کے بیشتر علاقوں میں موسم خشک جبکہ پہاڑی علاقوں میں رات اور صبح کے اوقات میں سرد رہنے کا امکان ہے۔
محکمہ موسمیات کاکہنا ہے کہ بالائی خیبر پختونخوا، گلگت بلتستان اور کشمیر میں مطلع جزوی ابرآلود رہنے کے علاوہ بارش ہونے کی توقع ہے جبکہ اسلام آباد اور گرد و نواح میں موسم خشک رہے گا۔
اسی طرح مری، گلیات اور گرد و نواح میں موسم سرد جبکہ سیالکوٹ اور گرد و نواح میں رات کے او قات دھند رہنے کا امکان ہے، سندھ اور بلوچستان کے بیشتر اضلاع میں موسم خشک اورسرد رہے گا۔
چترال، دیر،کوہستان، سوات، مالاکنڈ اور کرم میں چند مقامات پر بارش ہونے کی توقع ہے، آزاد کشمیر اور گلگت بلتستان کے مختلف علاقوں میں چند مقامات پر بارش کا امکان ظاہر کیا گیا ہے۔
محکمہ موسمیات کے مطابق گزشتہ چوبیس گھنٹوں کے دوران ملک کے بیشتر علاقوں میں موسم خشک جبکہ پہاڑی علاقوں میں سردرہا۔
دوسری جانب کراچی میں خشک موسم، رات کے وقت خنکی اور دن میں گرمی کی وجہ سے دمہ، الرجی، بخار اور سانس کی بیماریوں میں مبتلا مریضوں کی تعداد میں اضافہ ہونے لگا ہے۔
طبی ماہرین کا کہنا ہے کہ گرد آلود ہواؤں، کچرا جلانے اور صفائی ستھرائی کے ناقص انتظامات نے صورتحال کو مزید بگاڑ دیا ہے، کراچی کے سرکاری و نجی اسپتالوں میں دمہ، بخار، ملیریا اور ڈینگی کے مریضوں میں اضافہ سامنے آیا ہے۔
علاوہ ازیں لاہور آج ایک بار پھر آلودہ ترین شہروں میں سرفہرست ہے، صوبائی دارالحکومت کا اوسط ایئر کوالٹی انڈیکس 266 تک پہنچ گیا جس کے پیش نظر پنجاب میں ایمرجنسی ایکشن پلان فعال کر دیا گیا ہے۔
By 
