حج 2026 کے لیے سرکاری حج اسکیم کے تحت عازمین کا انتخاب باقاعدہ طور پر مکمل ہوگیا ہے۔ وزارتِ مذہبی امور کے مطابق سرکاری اسکیم میں شامل ہونے والے بڑی تعداد میں عازمین نے تمام مراحل طے کرلیے ہیں، جبکہ دوسری اور آخری قسط جمع کرانے کا عمل بھی کامیابی سے مکمل ہوچکا ہے۔
وزارت کے مطابق مجموعی طور پر ایک لاکھ 18 ہزار عازمینِ حج نے اپنی ساڑھے 6 لاکھ روپے کی دوسری قسط مقررہ وقت کے اندر جمع کرادی۔ حج 2026 کے لیے رواں برس عازمین کی جانب سے بھرپور دلچسپی کا اظہار دیکھنے میں آیا، جس کے باعث سرکاری اسکیم کے تمام کوٹے جلد مکمل ہوگئے۔
وزارتِ مذہبی امور نے اس سال حاجیوں کی سہولت کے لیے رقم جمع کرانے کا طریقہ کار آسان بناتے ہوئے یکمشت ادائیگی کے بجائے دو اقساط کی سہولت فراہم کی۔ حکام کے مطابق اس اقدام کا مقصد زیادہ سے زیادہ لوگوں کو مالی آسانی فراہم کرنا اور ان پر بیک وقت ادائیگی کا بوجھ کم کرنا تھا۔
اس کے علاوہ وزارت نے اس سال حج درخواستوں کے سلسلے میں قرعہ اندازی کا مرحلہ ختم کرتے ہوئے ‘پہلے آئیں، پہلے پائیں’ کی بنیاد پر درخواستیں قبول کیں۔ اس پالیسی کے تحت مقررہ کوٹے کے پورا ہوتے ہی درخواستوں کی وصولی روک دی گئی۔
وزارت مذہبی امور کے ذرائع کا کہنا ہے کہ آئندہ چند ہفتوں میں عازمین کو رہائش، سفری انتظامات، تربیتی شیڈول اور دیگر انتظامی معاملات سے متعلق تفصیلی معلومات فراہم کردی جائیں گی۔ اسی دوران حجاج کرام کے لیے بائیومیٹرک، ویزا پراسیسنگ اور تربیتی ورکشاپس کا سلسلہ بھی شروع ہوگا۔
ماہرین کے مطابق رواں سال کے دوران حکومت کی جانب سے کیے گئے انتظامی اقدامات نے حج درخواستوں کے عمل کو پہلے کے مقابلے میں زیادہ شفاف اور آسان بنایا ہے، جبکہ اقساط کی سہولت کو عوامی سطح پر خوب سراہا گیا ہے۔
