بلوچستان کی ترقی میں سول سوسائٹی کا کردار اہم،منفی پراپیگنڈے کو مسترد کرنا ہوگا،فیلڈ مارشل

چیف آف ڈیفنس فورسز ،فیلڈ مارشل سید عاصم منیر نے منفی پروپیگنڈے کے مؤثر تدارک میں سول سوسائٹی کی کوششوں کو نہایت اہم قرار دیتے ہوئے کہا ہے کہ ذاتی مفادات اور سیاسی ایجنڈوں کو مسترد کرنا وقت کی اہم ضرورت ہے۔

پاک فوج کے شعبہ تعلقاتِ عامہ (آئی ایس پی آر) کی جانب سے جاری بیان کے مطابق چیف آف ڈیفنس فورسز فیلڈ مارشل سید عاصم منیر نے جنرل ہیڈکوارٹرز (جی ایچ کیو) میں بلوچستان سے متعلق 18ویں نیشنل ورکشاپ کے شرکاء سے ملاقات کی اور ان سے تفصیلی تبادلۂ خیال کیا۔

آئی ایس پی آر کے مطابق اس ورکشاپ کے دوران بلوچستان کی سماجی و معاشی ترقی اور پاکستان کے لیے اس کی تزویراتی حیثیت پر غور کیا گیا۔ فیلڈ مارشل سید عاصم منیر نے اس موقع پر بلوچستان کے عوام کی ثابت قدمی، قربانیوں اور حب الوطنی کو سراہتے ہوئے کہا کہ بلوچستان ملک کی مجموعی خوشحالی اور ترقی میں نہایت اہم اور فیصلہ کن کردار ادا کر رہا ہے۔

انہوں نے وفاقی اور صوبائی حکومتوں کی جانب سے کیے جانے والے وسیع البنیاد اقدامات کی تعریف کی اور اس بات پر زور دیا کہ عوامی فلاح و بہبود پر مبنی پالیسیوں کے ذریعے صوبے کے سماجی و معاشی حالات میں بہتری لانا ناگزیر ہے۔ ان کا کہنا تھا کہ بلوچستان کے وسیع قدرتی اور معاشی وسائل کو مقامی آبادی کے مفاد میں استعمال کرنا حکومت کی اولین ترجیحات میں شامل ہے۔

یہ بھی پڑھیں :ہمارا ملک بتدریج مگر یقینی طور پر استحکام، وسیع تر مواقع اور عزت ووقار کی طرف بڑھ رہا ہے ، فیلڈ مارشل

چیف آف ڈیفنس فورسز نے سول سوسائٹی کے مثبت اور تعمیری کردار کو اجاگر کرتے ہوئے بالخصوص منفی اور گمراہ کن پروپیگنڈے کے خلاف ان کی کاوشوں کو قابلِ قدر قرار دیا۔ انہوں نے کہا کہ پائیدار ترقی کے حصول کے لیے ضروری ہے کہ ذاتی، گروہی اور مفاداتی سیاسی ایجنڈوں کو یکسر مسترد کیا جائے، تاکہ بلوچستان کا مستقبل تمام باشندوں کے لیے طویل المدتی خوشحالی سے جڑا رہے۔

سیکیورٹی صورتحال پر بات کرتے ہوئے فیلڈ مارشل سید عاصم منیر نے کہا کہ بھارت کے حمایت یافتہ پراکسی عناصر بلوچستان میں تشدد کو ہوا دے کر ترقی کے عمل کو نقصان پہنچانے کی کوشش کر رہے ہیں۔ انہوں نے واضح کیا کہ ایسے مذموم عزائم کو سیکیورٹی فورسز کی مؤثر اور بھرپور کارروائیوں کے ذریعے ناکام بنایا جائے گا اور صوبے کو دہشت گردی اور بدامنی سے پاک کیا جائے گا۔

انہوں نے علاقائی امن و استحکام کے لیے پاکستان کے عزم کا اعادہ کرتے ہوئے کہا کہ پاکستان کی علاقائی سالمیت کی کسی بھی قسم کی خلاف ورزی، خواہ وہ براہِ راست ہو یا بالواسطہ، کا سخت، مؤثر اور فیصلہ کن جواب دیا جائے گا۔ فیلڈ مارشل نے کہا کہ پاکستان کی مسلح افواج اپنے شہریوں کی جان و مال کے تحفظ کے لیے ہر وقت پرعزم اور تیار ہیں۔

آئی ایس پی آر کے بیان کے مطابق ملاقات کے اختتام پر ایک جامع سوال و جواب کا سیشن بھی منعقد ہوا جس میں فیلڈ مارشل سید عاصم منیر نے شرکاء کے سوالات کے تفصیلی جوابات دیے اور بلوچستان کی ترقی اور سیکیورٹی سے متعلق جاری اقدامات پر مزید روشنی ڈالی۔