اسلام آباد کے سیکٹر جی سیون میں ہونے والے گیس سلنڈر دھماکے کی ابتدائی تحقیقاتی رپورٹ مکمل کر لی گئی ہے جس کے مطابق یہ واقعہ گیس لیکیج کے باعث پیش آیا۔ دھماکے سے تین مکانات مکمل طور پر تباہ ہو گئے جبکہ دو مکانات کو جزوی نقصان پہنچا۔ اس حادثے میں اب تک 8 افراد جاں بحق اور 11 زخمی ہوئے ہیں زخمیوں کوفوری طور پر قریبی ہسپتالوں میں منتقل کیا گیا۔
ابتدائی تحقیقاتی رپورٹ میں بتایا گیا ہے کہ جاں بحق افراد کی ہلاکت زیادہ تر جھلسنے اور ملبے تلے دبنے کی وجہ سے ہوئی۔ جائے وقوعہ سے گیس پائپ لائن اور گیس کنکشن کے سیمپل جمع کر لیے گئے ہیں تاکہ مزید تفصیلی تحقیقات ممکن ہو سکیں اور حادثے کی اصل وجوہات سامنے آئیں۔
واضح رہے کہ اسلام آباد کے ایف 7 مرکز میں بھی ایک پیٹرول پمپ پر حال ہی میں گیس سلنڈر دھماکے کے نتیجے میں دو خواتین جاں بحق ہو گئی تھیں، جس سے یہ ظاہر ہوتا ہے کہ شہر میں گیس کے استعمال اور حفاظتی اقدامات میں سنجیدہ چیلنجز موجود ہیں۔
سیکٹر جی سیون میں ہونے والا دھماکا ایک شادی کی تقریب کے دوران پیش آیا، جس میں دلہا اور دلہن بھی جاں بحق ہوئے۔ متاثرہ گھروں سے 19 افراد کو ملبے تلے سے نکالا گیا اور انہیں فوری طبی امداد فراہم کی گئی۔ امدادی ادارے اور فائر بریگیڈ نے موقع پر پہنچ کر بچاؤ اور ریسکیو کے کام کو مکمل کیا۔
ابتدائی رپورٹس کے مطابق یہ حادثہ انتہائی سنگین نوعیت کا تھا اور متعلقہ حکام مزید تحقیقات کر کے ذمہ دار عناصر یا تکنیکی نقص کی تفصیلات سامنے لانے کے لیے کام کر رہے ہیں۔ شہریوں سے بھی اپیل کی گئی ہے کہ وہ گیس کے استعمال میں احتیاط کریں اور کسی بھی مشکوک لیکیج کی اطلاع فوراً متعلقہ اداروں کو دیں۔
By 
