کراچی میں کھیلے گئے پاکستان سپر لیگ کے گیارہویں مرحلے کے اہم مقابلے میں حیدرآباد کنگزمین نے عمدہ کارکردگی کا مظاہرہ کرتے ہوئے اسلام آباد یونائیٹڈ کو چھ وکٹوں سے شکست دے دی، میچ نیشنل بینک کرکٹ اسٹیڈیم میں کھیلا گیا جہاں شائقینِ کرکٹ کی بڑی تعداد موجود تھی ۔
دونوں ٹیموں کے درمیان سنسنی خیز مقابلہ دیکھنے کو ملا۔اسلام آباد یونائیٹڈ نے پہلے بیٹنگ کرتے ہوئے مقررہ بیس اوورز میں 153 رنز اسکور کیے۔ ٹیم کی جانب سے ڈیوڈ کانووے پینتالیس رنز بنا کر نمایاں رہے جبکہ مارک چیپمین نے بیالیس رنز کی ذمہ دارانہ اننگ کھیلی۔ دیگر کھلاڑیوں میں سمیر منہاس نے بائیس اور محمد فائق نے اٹھارہ رنز بنائے۔ تاہم ٹیم کے دیگر بلے باز خاطر خواہ کارکردگی دکھانے میں ناکام رہے، جس کے باعث مجموعی اسکور زیادہ بڑا نہ بن سکا۔
حیدرآباد کنگزمین کی باؤلنگ لائن نے شاندار نظم و ضبط کا مظاہرہ کیا۔ آصف محمود نے بہترین گیند بازی کرتے ہوئے چار اہم وکٹیں حاصل کیں اور حریف ٹیم کی بیٹنگ لائن کو مشکلات سے دوچار رکھا۔ ان کے علاوہ محمد علی نے دو جبکہ گلین میکس ویل نے ایک کھلاڑی کو آؤٹ کیا۔
جواب میں حیدرآباد کنگزمین نے ہدف کا تعاقب پراعتماد انداز میں کیا اور انیسویں اوور میں چار وکٹوں کے نقصان پر مطلوبہ ہدف حاصل کر لیا۔ ٹیم کے کپتان مارنوس لبوشیانے نے ذمہ دارانہ اور شاندار بیٹنگ کرتے ہوئے اکسٹھ رنز کی ناقابلِ شکست اننگ کھیلی اور ٹیم کو فتح دلانے میں کلیدی کردار ادا کیا۔ صائم ایوب نے پینتیس اور معاذ صداقت نے تیس رنز بنا کر ٹیم کی کامیابی میں اہم حصہ ڈالا۔
اسلام آباد یونائیٹڈ کی جانب سے فہیم اشرف اور کرس گرین نے دو دو وکٹیں حاصل کیں، تاہم وہ اپنی ٹیم کو شکست سے نہ بچا سکے۔ اس کامیابی کے بعد حیدرآباد کنگزمین کی پوزیشن مضبوط ہو گئی ہے جبکہ اسلام آباد یونائیٹڈ کو آئندہ مقابلوں میں بہتر کارکردگی دکھانے کی ضرورت ہوگی۔
By 
