موبائل فون ٹیکس ختم کرنے کی تجویز زیر غور، حکومت کا سہولیات بڑھانے کا عندیہ

وفاقی وزیر برائے پارلیمانی امور طارق فضل چوہدری نے کہا ہے کہ موبائل فونز پر عائد ٹیکس ختم کرنے کی تجویز حکومت کے زیر غور ہے، تاہم اس حوالے سے حتمی فیصلہ ابھی نہیں کیا گیا۔

سینیٹ اجلاس کے دوران اظہار خیال کرتے ہوئے انہوں نے کہا کہ موجودہ معاشی حالات میں حکومت کو بعض اوقات ایسے اقدامات کرنے پڑتے ہیں جو آسان نہیں ہوتے، لیکن عوامی ریلیف کو بھی پیش نظر رکھا جا رہا ہے۔

یہ بھی پڑھیں :موبائل فونز پر ٹیکس میں کمی سے متعلق اہم خبر سامنے آگئی

موبائل فون رجسٹریشن نظام پر وضاحت

وفاقی وزیر نے وضاحت کی کہ بیرون ملک سے پاکستان لائے جانے والے موبائل فونز بعض صورتوں میں رجسٹریشن نہ ہونے کے باعث کچھ عرصے بعد نیٹ ورک پر بلاک ہو جاتے ہیں، یہ نظام اس لیے بنایا گیا ہے تاکہ غیر قانونی یا غیر رجسٹرڈ ڈیوائسز کا استعمال روکا جا سکے۔

انہوں نے کہا کہ حکومت اس نظام میں بہتری لانے اور اوورسیز پاکستانیوں کو سہولت دینے کے لیے مختلف آپشنز پر کام کر رہی ہے ،مختلف تجاویز زیر غور ہیں۔

اوورسیز پاکستانیوں کے لیے سہولت کا اعلان

طارق فضل چوہدری کے مطابق حکومت کی کوشش ہے کہ بیرون ملک مقیم پاکستانیوں کو زیادہ سے زیادہ سہولیات فراہم کی جائیں تاکہ وہ وطن واپسی پر یا موبائل فون لانے کی صورت میں کسی مشکل کا شکار نہ ہوں۔

موبائل فونز کی قیمتوں اور ٹیکس میں اضافہ

دوسری جانب حالیہ رپورٹس کے مطابق فیڈرل بورڈ آف ریونیو نے استعمال شدہ موبائل فونز کی درآمدی ویلیو میں نمایاں اضافہ کیا ہے، جس کے بعد مختلف ماڈلز مہنگے ہو گئے ہیں۔

نئی ویلیو ایشن کے مطابق متعدد موبائل فونز پر درآمدی قیمت بڑھنے سے ان پر عائد ٹیکس بھی بڑھ جائے گا، جس کا براہِ راست اثر صارفین پر پڑے گا۔

گوگل پکسل سیریز سمیت کئی ماڈلز کی قیمتوں میں نمایاں اضافہ ریکارڈ کیا گیا ہے، جس کے بعد موبائل فونز کی مجموعی لاگت مزید بڑھنے کا امکان ہے۔

آئندہ فیصلے کا انتظار

حکومتی ذرائع کے مطابق موبائل فون ٹیکس میں ممکنہ تبدیلی کے حوالے سے مختلف تجاویز کا جائزہ لیا جا رہا ہے، تاہم اس سلسلے میں حتمی فیصلہ متعلقہ معاشی حالات اور پالیسی مشاورت کے بعد کیا جائے گا۔