ہائبرڈ گاڑیاں سستی ہونے کا امکان ، حکومت نے ٹیکس میں بڑی کمی کی تجویز دیدی

وفاقی حکومت درآمد شدہ اور مقامی سطح پر اسمبل ہونے والی ہائبرڈ الیکٹرک گاڑیوں پر سیلز ٹیکس 25 فیصد سے کم کرکے 18 فیصد کرنے کی منصوبہ بندی کر رہی ہے اوراس اقدام کا مقصد ماحول دوست گاڑیوں کو عام شہریوں کی قوت خرید میں لانا ہے۔

میڈیا رپورٹ کے مطابق ذرائع کا کہنا ہے کہ اس تجویز کی سمری پہلے ہی وزارتِ خزانہ (فنانس ڈویژن) کو بھجوا دیا گیا ہے تاہم اس فیصلے پر عمل درآمد سے قبل وفاقی کابینہ کی حتمی منظوری درکار ہوگی۔

یاد رہے کہ ہائبرڈ گاڑیوں پر پہلے دی گئی کم سیلز ٹیکس کی رعایت 30 جون 2026 کو ختم ہوگئی تھی،  جس کے بعد یکم جولائی 2026 سے سیلز ٹیکس بڑھ کر 25 فیصد ہو گیا، جس کے نتیجے میں ہائبرڈ گاڑیوں کی قیمتوں میں اضافہ ہوا اور ان کی فروخت بھی متاثر ہوئی۔

ہائبرڈ گاڑیاں کیوں اہم ہیں؟

ہائبرڈ گاڑیاں پیٹرول اور بجلی دونوں سے چلتی ہیں، جس کی وجہ سے یہ کم ایندھن استعمال کرتی ہیں، ماحول کو کم آلودہ کرتی ہیں اور نقصان دہ گیسوں کے اخراج میں بھی کمی لاتی ہیں ،  کراچی، لاہور اور دیگر بڑے شہروں میں بڑھتی ہوئی فضائی آلودگی کے پیش نظر ایسی گاڑیوں کا استعمال ماحول کے لیے فائدہ مند سمجھا جاتا ہے۔

پاکستان اس وقت بڑھتی ہوئی ایندھن کی قیمتوں اور موسمیاتی تبدیلی جیسے سنگین چیلنجز کا سامنا کر رہا ہے ، ماہرین کا کہنا ہے کہ اگر ہائبرڈ گاڑیوں پر ٹیکس کم کیا جاتا ہے تو زیادہ لوگ روایتی پیٹرول گاڑیوں کے بجائے ماحول دوست ہائبرڈ گاڑیوں کا انتخاب کریں گے۔

گاڑیوں کی قیمتوں اور آٹو انڈسٹری پر ممکنہ اثرات

ماہرین کے مطابق سیلز ٹیکس میں مجوزہ کمی سے ہائبرڈ گاڑیوں کی قیمتوں میں کمی آنے کا امکان ہے، جس سے ان کی طلب میں اضافہ ہوگا،  اس اقدام سے مقامی آٹو انڈسٹری کو بھی فائدہ پہنچ سکتا ہے، خصوصاً وہ کمپنیاں جو Toyota، Haval اور Hyundai کی ہائبرڈ گاڑیاں پاکستان میں اسمبل کر رہی ہیں۔

یہ بھی پڑھیں :سوزوکی فرونکس نے پاکستانی آٹو مارکیٹ میں دھوم مچا دی

اس کے علاوہ یہ فیصلہ پاکستان کو صاف اور ماحول دوست ٹرانسپورٹ کے فروغ میں مدد دے گا اور ملک کے گرین اہداف کے حصول میں بھی اہم کردار ادا کرے گا۔

روزگار اور سرمایہ کاری میں بھی اضافہ متوقع

گزشتہ چند برسوں کے دوران پاکستان میں ہائبرڈ گاڑیوں کی مارکیٹ میں نمایاں ترقی دیکھی گئی ہے ، توقع کی جا رہی ہے کہ مجوزہ ٹیکس ریلیف سے نئی سرمایہ کاری آئے گی، روزگار کے مواقع پیدا ہوں گے اور متوسط طبقے کے لیے ماحول دوست سفری سہولیات تک رسائی آسان ہو جائے گی۔

اگر وفاقی کابینہ اس تجویز کی منظوری دے دیتی ہے تو ہائبرڈ گاڑیوں پر 18 فیصد سیلز ٹیکس کا نیا ریٹ جلد نافذ کیا جا سکتا ہے، جس سے ملک کی سڑکوں اور ماحول دونوں پر مثبت اثرات مرتب ہونے کی امید ہے۔