سلمان خان بریانی کھاتے رہے، سر میں انجیکشن لگتے رہے، فلمساز نے کیا دیکھا؟

بالی ووڈ سپر اسٹار سلمان خان سے متعلق فلمساز شیلندر سنگھ نے ایک دلچسپ اور حیران کن واقعہ بیان کیا ہے، جس میں انہوں نے اداکار کو ایک ساتھ بریانی کھاتے اور بالوں کے علاج کے لیے انجیکشن لگواتے ہوئے دیکھنے کا دعویٰ کیا۔

حال ہی میں سائرس بروچا کے پوڈکاسٹ میں گفتگو کرتے ہوئے شیلندر سنگھ نے بتایا کہ یہ واقعہ ممبئی میں سلمان خان کی رہائش گاہ پر پیش آیا، جہاں وہ ایک ملاقات کے لیے گئے تھے۔

یہ بھی پڑھیں:شہناز گل نے پاکستانی ڈراموں کی تعریفوں کے پل باندھ دیے،پسندیدہ فنکار کون؟

ان کے مطابق سلمان خان کھانے کی میز پر بیٹھ کر بریانی کھا رہے تھے اور سامنے رکھے آئینے میں خود کو دیکھ رہے تھے۔ شیلندر سنگھ نے بتایا کہ اداکار کو آئینے کے سامنے بیٹھ کر کھانا پسند ہے اور وہ اکثر سامنے بیٹھے افراد سے بھی آئینے کے ذریعے بات کرتے ہیں۔

فلمساز کے مطابق اسی دوران دستانے پہنے ایک شخص وہاں آیا اور سلمان خان کے سر کی جلد میں انجیکشن لگانا شروع کر دیا، جبکہ اداکار پرسکون انداز میں اپنا کھانا کھاتے رہے۔

یہ بھی پڑھیں:معمر رانا کے معاوضے پر تنازع، سنگیتا نے بتایا اداکار کو کتنی رقم ادا کی گئی

شیلندر سنگھ نے بتایا کہ یہ منظر دیکھ کر وہ حیران رہ گئے اور ان کے ذہن میں سوال آیا کہ آخر یہ کیا ہو رہا ہے۔ ان کے مطابق سلمان خان نے مسکراتے ہوئے صرف اتنا کہا، ’اسٹار بننے کی ایک قیمت تو ادا کرنی پڑتی ہے، بھائی۔‘

بعد میں شیلندر سنگھ کو معلوم ہوا کہ اداکار پلیٹلیٹ رچ پلازما تھراپی کروا رہے تھے، جو بالوں کے جھڑنے کے علاج کے لیے استعمال ہونے والا ایک معروف طبی طریقہ ہے۔ پی آر پی تھراپی میں مریض کے اپنے خون سے پلازما حاصل کرکے اسے سر کی جلد میں انجیکٹ کیا جاتا ہے تاکہ بالوں کی نشوونما کو بہتر بنایا جا سکے۔

شیلندر سنگھ نے یہ بھی کہا کہ اس وقت انہیں اس علاج کے بارے میں زیادہ معلومات نہیں تھیں، تاہم بعد میں انہیں معلوم ہوا کہ یہ بالوں کے علاج کے لیے استعمال ہونے والی ایک مخصوص طبی تکنیک ہے۔