حج 2027 میں بڑی سہولت، 4 لاکھ عازمین گھر بیٹھے درخواست و ادائیگی کر سکیں گے

وفاقی وزیر مذہبی امور سردار محمد یوسف نے کہا ہے کہ وزیراعظم کی خصوصی ہدایت پر حج 2027 کے پورے عمل کو اینڈ ٹو اینڈ ڈیجیٹلائز کر دیا گیا ہے، جس کے تحت عازمین گھر بیٹھے پاک حج ایپ اور ڈیجیٹل پورٹل کے ذریعے چند منٹ میں درخواست اور ادائیگی کا عمل مکمل کر سکیں گے۔

اسلام آباد میں نیوز کانفرنس کرتے ہوئے سردار محمد یوسف نے کہا کہ تقریباً 4 لاکھ پری رجسٹرڈ عازمین حج درخواستوں کے حتمی مرحلے میں داخل ہوگئے ہیں، ڈیجیٹل نظام کا مقصد عازمین کو طویل قطاروں، غیر ضروری سفر اور اضافی اخراجات سے بچانا ہے۔

وفاقی وزیر کے مطابق حج واجبات کی ادائیگی کیلئے 3 ڈیجیٹل ذرائع فراہم کئے گئے ہیں، جن کے ذریعے عازمین گھر بیٹھے ادائیگی کر سکیں گے، سرکاری حج سکیم 2027 کے تحت ایک لاکھ 7 ہزار 526 نشستیں مختص کی گئی ہیں، جبکہ 40 روزہ لانگ حج سکیم کا پیکیج 12 لاکھ روپے مقرر کیا گیا ہے۔

یہ بھی پڑھیں :4 سالہ حج پالیسی متعارف ، رجسٹریشن اور پیکج کی تفصیلات سامنے آگئیں

وزارت مذہبی امور کے مطابق حج 2027 کی پہلی قسط کی وصولی 17 اگست سے شروع ہوگی اور منتخب حج پیکیج کی 50 فیصد رقم پہلی قسط میں جمع کرانا لازمی ہوگی۔

سردار محمد یوسف نے بتایا کہ حبیب بینک لمیٹڈ کو وزارت مذہبی امور کا مجاز بینکنگ پارٹنر مقرر کیا گیا ہے، اس سلسلے میں وزارت اور حبیب بینک کے درمیان مفاہمتی یادداشت پر دستخط کیے گئے۔

یہ بھی پڑھیں :حج 2027 کی تیاری آسان ، عازمین اب فوری بنیادوں پر پاسپورٹ بنوا سکیں گے

اس موقع پر حبیب بینک کے نمائندے محمد اسد خان کا کہنا تھا  کہ بینک کو عازمین حج کی خدمت کا موقع ملنے پر خوشی ہے، حبیب بینک ملک بھر میں 1700 سے زائد برانچز کے ذریعے عازمین کو خدمات فراہم کرے گا اور اسلامی بینکاری کے تحت عازمین سے کوئی اضافی چارجز وصول نہیں کیا جائے گا،  ملک بھر میں شریعہ کمپلائنٹ بینکاری خدمات فراہم کی جا رہی ہیں۔

یہ بھی پڑھیں : پرائیویٹ حج کا نیا ڈیجیٹل نظام نافذ کرنے کا فیصلہ ، بکنگ وزارتِ مذہبی اُمور کے ذریعے ہوگی

وفاقی وزیر مذہبی امور نے کہا کہ حج کے عمل کی ڈیجیٹلائزیشن عازمین کو آسان، شفاف اور تیز رفتار خدمات فراہم کرنے کی جانب اہم قدم ہے۔