آزد کشمیر انتخابات ، ایل اے 15 اور 16 کے 23 پولنگ اسٹیشنز پرووٹنگ آج ہو گی

آزاد کشمیر کے ضلع باغ کے دو انتخابی حلقوں میں مجموعی طور پر 23 پولنگ اسٹیشنز پر آج دوبارہ پولنگ ہوگی، جس کے لیے انتخابی عملے اور سکیورٹی اہلکاروں کی تعیناتی سمیت تمام انتظامات مکمل کرلیے گئے ہیں۔

حکام کے مطابق حلقہ ایل اے 15 باغ 2 کے 9 پولنگ اسٹیشنز پر دوبارہ پولنگ ہوگی، جہاں مجموعی طور پر 5 ہزار 32 ووٹرز اپنا حق رائے دہی استعمال کرسکیں گے۔ پولنگ کے عمل کو پرامن، شفاف اور منظم انداز میں مکمل کرنے کے لیے متعلقہ اداروں کی جانب سے انتظامات مکمل کرلیے گئے ہیں۔

اسی طرح حلقہ ایل اے 16 باغ 3 کے 14 پولنگ اسٹیشنز پر بھی آج دوبارہ پولنگ ہوگی۔ ان پولنگ اسٹیشنز پر مجموعی طور پر 7 ہزار 238 ووٹرز رجسٹرڈ ہیں جو دوبارہ اپنے ووٹ کا حق استعمال کریں گے۔

 یہ بھی پڑھیں :آزاد کشمیرانتخابات کا دوسرا مرحلہ ، کئی سیاسی اپ سیٹ، 7 نئے چہرے اسمبلی پہنچ گئے

ترجمان کے مطابق دونوں حلقوں میں دوبارہ پولنگ کے لیے انتخابی عملہ اور سکیورٹی اہلکار متعلقہ پولنگ اسٹیشنز پر پہنچ چکے ہیں۔ انتخابی عمل کی نگرانی اور پولنگ اسٹیشنز پر سکیورٹی کو یقینی بنانے کے لیے بھی خصوصی انتظامات کیے گئے ہیں۔

حکام کا کہنا ہے کہ دوبارہ پولنگ کے دوران ووٹرز کو اپنی انتخابی ذمہ داری ادا کرنے کے لیے ضروری سہولیات فراہم کی جائیں گی۔ پولنگ کے عمل کو شفاف بنانے اور کسی بھی ناخوشگوار صورتحال سے نمٹنے کے لیے متعلقہ ادارے الرٹ رہیں گے۔

دونوں حلقوں میں دوبارہ پولنگ کے باعث سیاسی جماعتوں اور امیدواروں کی سرگرمیاں بھی اہمیت اختیار کرگئی ہیں۔ امیدواروں کی جانب سے اپنے حامیوں اور ووٹرز کو پولنگ اسٹیشنز تک پہنچانے کے لیے رابطے کیے جارہے ہیں جبکہ انتخابی عمل پر سیاسی جماعتوں کی نظریں مرکوز ہیں۔

حلقہ ایل اے 15 وسطی باغ کے انتخابی نتائج کے مطابق پاکستان پیپلزپارٹی کے امیدوار ضیاء القمر 16 ہزار 637 ووٹ لے کر پہلے نمبر پر ہیں، جبکہ مسلم لیگ (ن) کے راجہ مشتاق منہاس 15 ہزار 15 ووٹ کے ساتھ دوسرے نمبر پر ہیں۔ جماعت اسلامی کے بریگیڈیئر راجا محمد خان 12 ہزار سے زائد ووٹ لے کر تیسرے نمبر پر ہیں۔

 یہ بھی پڑھیں :دھرنے دینے والے آزاد کشمیر الیکشن روکنا چاہتے تھے جو نہ روک سکے، ن لیگ دو تہائی اکثریت سے حکومت بنائیگی، رانا ثناء

موجودہ انتخابی صورتحال میں راجہ مشتاق منہاس بھی مقابلے میں اہم امیدوار سمجھے جارہے ہیں اور دوبارہ پولنگ کے نتائج حلقے کی مجموعی انتخابی پوزیشن پر اثر انداز ہوسکتے ہیں۔

دوسری جانب حلقہ ایل اے 16 شرقی باغ میں مسلم لیگ (ن) کے امیدوار سردار میر اکبر 18 ہزار 950 ووٹ لے کر پہلے نمبر پر ہیں، جبکہ پاکستان پیپلزپارٹی کے سردار قمرالزمان خان 15 ہزار 750 ووٹ کے ساتھ دوسرے نمبر پر موجود ہیں۔

سیاسی مبصرین کے مطابق سردار میر اکبر کو حاصل برتری کے باعث حلقہ ایل اے 16 میں ان کی پوزیشن نسبتاً مضبوط دکھائی دے رہی ہے، تاہم دوبارہ پولنگ کے نتائج حتمی انتخابی صورتحال پر اثر انداز ہوسکتے ہیں۔