پاکستان نے نیپال میں تباہ کن سیلاب اور لینڈ سلائیڈنگ سے متاثرہ افراد کی مدد کیلئے 100 ٹن انسانی امداد روانہ کردی، امدادی سامان چارٹرڈ طیارے کے ذریعے اسلام آباد سے نیپال بھیجا گیا ہے۔
دفتر خارجہ کے مطابق پاکستان نے مشکل کی گھڑی میں نیپال کے متاثرہ عوام کی مدد کیلئے بڑے پیمانے پر انسانی امداد فراہم کی ہے۔ نیشنل ڈیزاسٹر مینجمنٹ اتھارٹی (این ڈی ایم اے) کے تعاون سے تیار کیا گیا 100 ٹن امدادی سامان چارٹرڈ طیارے کے ذریعے اسلام آباد سے روانہ کیا گیا۔
ضروری سامان شامل
ترجمان دفتر خارجہ کے مطابق امدادی سامان میں متاثرہ خاندانوں کی فوری ضروریات کو مدنظر رکھتے ہوئے مختلف اشیا شامل کی گئی ہیں،امدادی سامان میں خیمے، کمبل، چٹائیاں، حفظانِ صحت کی کٹس اور ضروری ادویات شامل ہیں، جو سیلاب اور لینڈ سلائیڈنگ سے متاثرہ افراد کو بنیادی سہولیات کی فراہمی میں مدد دیں گی۔
اسلام آباد میں تقریب
امدادی سامان روانہ کرنے کے موقع پر اسلام آباد انٹرنیشنل ایئرپورٹ پر خصوصی تقریب بھی منعقد ہوئی،تقریب میں پاکستان میں تعینات نیپال کے سفیر، وزارت خارجہ، نیشنل ڈیزاسٹر مینجمنٹ اتھارٹی اور دیگر متعلقہ اداروں کے سینئر حکام نے شرکت کی۔
دفتر خارجہ کا کہنا ہے کہ پاکستان کی جانب سے امدادی سامان کی فراہمی قدرتی آفت سے متاثرہ نیپالی عوام کے ساتھ یکجہتی اور ہمدردی کا عملی اظہار ہے،ترجمان کے مطابق پاکستان مشکل کی اس گھڑی میں حکومت اور عوامِ نیپال کے ساتھ کھڑا ہے اور متاثرین کی مشکلات کم کرنے کیلئے ہر ممکن تعاون جاری رکھے گا۔
قدرتی آفت سے بڑے پیمانے پر نقصان
نیپال میں شدید بارشوں کے باعث سیلاب اور لینڈ سلائیڈنگ نے مختلف علاقوں میں معمولات زندگی کو متاثر کیا ہے،قدرتی آفت کے باعث متعدد علاقوں میں لوگوں کو مشکلات کا سامنا ہے اور متاثرہ آبادی کو خوراک، رہائش، طبی امداد اور دیگر بنیادی ضروریات کی ضرورت ہے۔
پاکستان کی جانب سے بھیجی گئی امداد متاثرہ افراد کو ہنگامی بنیادوں پر ضروری اشیا کی فراہمی میں معاون ثابت ہوگی،دفتر خارجہ نے واضح کیا ہے کہ پاکستان قدرتی آفات کے دوران متاثرہ ممالک اور عوام کے ساتھ تعاون اور انسانی ہمدردی کی بنیاد پر امداد فراہم کرتا رہا ہے،نیپال کیلئے حالیہ امدادی کھیپ بھی دونوں ممالک کے درمیان دوستانہ تعلقات اور عوامی سطح پر باہمی ہمدردی کی عکاسی کرتی ہے۔
By 
