ہالی ووڈ اسٹار جانی ڈیپ کا فرانس میں کروڑوں ڈالر کا منفرد گاؤں

ہالی ووڈ کے معروف اداکار جانی ڈیپ نے چھٹیوں کے لیے فرانس میں صرف ایک گھر نہیں خریدا بلکہ تقریباً 30 ایکڑ رقبے پر پھیلا ایک پورا تاریخی گاؤں ہی خرید لیا، جسے بعد میں انہوں نے اپنے ذوق اور تخلیقی انداز کے مطابق ایک منفرد نجی رہائش گاہ میں تبدیل کردیا۔

جنوبی فرانس میں مشہور سیاحتی مقام سینٹ ٹروپے کے قریب واقع یہ تاریخی گاؤں 19ویں صدی سے تعلق رکھتا ہے۔ جانی ڈیپ نے اسے 2001 میں خریدا تھا، اس وقت یہ جگہ تقریباً ویران ہوچکی تھی۔ بین الاقوامی میڈیا رپورٹس کے مطابق اداکار نے اس جائیداد کی خریداری پر تقریباً 5 کروڑ 50 لاکھ ڈالر خرچ کیے، جبکہ بعد میں اس کی تزئین و آرائش پر مزید تقریباً ایک کروڑ ڈالر خرچ کیے گئے۔

یہ بھی پڑھیں :اداکاری اور گلو کاری کے بعد ہانیہ عامر کا باکسنگ رنگ میں اترنے کا فیصلہ

جانی ڈیپ نے گاؤں کی تاریخی شناخت کو برقرار رکھتے ہوئے اس کی مختلف عمارتوں کو اپنی پسند کے مطابق سجایا۔ روایتی فرانسیسی طرز تعمیر کے ساتھ ان کے ذاتی اور فنکارانہ ذوق کا امتزاج اس جگہ کو عام رہائش گاہ کے بجائے ایک منفرد نجی دنیا بناتا ہے۔ اس وسیع جائیداد میں رہائشی مکانات کے علاوہ مہمانوں کے لیے کاٹیجز، باغات، سوئمنگ پول، ایک بائسٹرو اور اسکیٹ پارک بھی موجود ہے۔

پرانی چرچ سے مہمان خانہ، منفرد ڈیزائن نے سب کو حیران کردیا

جائیداد کی ایک پرانی چرچ عمارت کو مہمان خانے میں تبدیل کیا گیا، جبکہ چرچ میں موجود ایک قدیم اعترافی نشست کو الماری کے طور پر استعمال کیا گیا۔ یہاں ایک پرانی گاڑی کو بھی غیر معمولی انداز میں تبدیل کیا گیا، جس کے اندر کچن اور باتھ روم بنا دیے گئے۔ اس کے علاوہ جانی ڈیپ کی مشہور فلم ’پائریٹس آف دی کیریبیئن‘ سے متاثر ایک تھیم والا شراب خانہ بھی اس جائیداد کا حصہ ہے۔

جانی ڈیپ کے بیٹے جیک کے لیے یہاں ایک اسکیٹ پارک بھی بنایا گیا تھا، جو اس منفرد نجی ٹھکانے کی خاص خصوصیات میں شمار ہوتا ہے۔

یہ بھی پڑھیں:وسیم اکرم نے فخر عالم کا ایسا راز کھول دیا کہ مداح حیران رہ گئے

فروخت کی کوشش ہوئی مگر خریدار نہ مل سکا

یہ غیر معمولی جائیداد ماضی میں کئی مرتبہ فروخت کے لیے بھی پیش کی گئی۔ 2015 میں اسے تقریباً 2 کروڑ 50 لاکھ ڈالر میں فروخت کرنے کی کوشش کی گئی، تاہم کوئی خریدار سامنے نہیں آیا۔ بعد ازاں 2021 میں اسے دوبارہ تقریباً 5 کروڑ 55 لاکھ ڈالر کی قیمت پر مارکیٹ کیا گیا، لیکن یہ کوشش بھی کامیاب نہ ہوسکی۔

جون 2024 میں سامنے آنے والی رپورٹس کے مطابق جانی ڈیپ نے بالآخر جائیداد کو مارکیٹ سے ہٹا لیا اور اسے فروخت کرنے کے بجائے مزید تزئین و آرائش پر توجہ دینے کا فیصلہ کیا۔

جانی ڈیپ کے لیے یہ جگہ جنت کیوں تھی؟

جانی ڈیپ ماضی میں ایک انٹرویو کے دوران فرانس کے اس گاؤں میں گزارے وقت کو یاد کرتے ہوئے اسے جنت سے تشبیہ دے چکے ہیں۔ اداکار کے مطابق سابق پارٹنر وینیسا پیراڈس اور اپنے بچوں کے ساتھ یہاں رہتے ہوئے انہیں ایک انتہائی پرسکون زندگی کا احساس ہوتا تھا۔ وہ وہاں باغبانی کرتے اور ہالی ووڈ کی مصروف زندگی سے دور وقت گزارتے تھے۔

یوں جانی ڈیپ کا یہ فرانسیسی گاؤں محض ایک مہنگی جائیداد نہیں بلکہ ان کی ذاتی پسند، فنکارانہ سوچ اور پرسکون زندگی سے جڑی ایک منفرد جگہ بن چکا ہے۔