عمرہ زائرین، بیرون ملک سفر کرنے والوں  کے لیے بڑی خوشخبری

عمرہ زائرین اور بیرون ملک سفر کرنے والے مسافروں کے لیے ویکسی نیشن سے متعلق اہم پیش رفت سامنے آئی ہے۔

حکام نے بغیر ویکسی نیشن سفر کی مقررہ مدت میں مزید 15 روز کی توسیع کردی ہے  جس کے بعد عمرہ زائرین اب 10 اکتوبر تک بغیر ویکسی نیشن سفر کرسکیں گے۔

حکام کے مطابق تاریخ میں توسیع کا مقصد عمرہ زائرین کے لیے سہولیات میں بہتری لانا اور انہیں ویکسی نیشن کے نئے طریقہ کار کے مطابق تیاری کے لیے مزید وقت فراہم کرنا ہے۔

10 اکتوبر تک مہلت

فوکل پرسن ڈاکٹر مرتضیٰ شاہ کے مطابق بغیر ویکسی نیشن سفر کی اجازت کی مدت میں مزید 15 دن کا اضافہ کیا گیا ہے۔ اس فیصلے کے بعد ایسے عمرہ زائرین جو ابھی تک مطلوبہ ویکسین نہیں لگوا سکے انہیں ویکسی نیشن مکمل کرنے کے لیے اضافی وقت مل گیا ہے۔

 یہ بھی پڑھیں :3 ماہ میں عمرہ زائرین کا نیا ریکارٖٖڈ ، سعودی عرب سے اعداد و شمار آگئے

حکام نے مسافروں کو مشورہ دیا ہے کہ وہ آخری وقت کا انتظار کرنے کے بجائے سفر سے پہلے ہی ویکسی نیشن اور متعلقہ دستاویزات کا عمل مکمل کرلیں تاکہ ایئرپورٹ پر کسی قسم کی پریشانی سے بچا جاسکے۔

انفلوئنزا اور میننجائٹس ویکسین لازمی

عمرہ زائرین کے لیے انفلوئنزا اور گردن توڑ بخار (میننجائٹس) کی ویکسین لازمی قرار دی گئی ہے۔

 بیرون ملک سفر کرنے والے مسافروں کے لیے ویکسی نیشن سرٹیفکیٹ کے اجرا کا نظام بھی ڈیجیٹل کیا جا رہا ہے۔

وفاقی حکومت نے ویکسی نیشن کے ریکارڈ کو نادرا کے نظام سے منسلک کردیا ہے۔ حکام کے مطابق اس اقدام کا مقصد سرٹیفکیٹس کے ریکارڈ کو ڈیجیٹل بنانا اور جعلی ویکسی نیشن سرٹیفکیٹس کے امکانات کو کم کرنا ہے۔

ڈیجیٹل سرٹیفکیٹ کا اجرا شروع

عمرہ زائرین اور بیرون ملک سفر کرنے والے دیگر مسافروں کے لیے ڈیجیٹلائزڈ ویکسی نیشن سرٹیفکیٹ جاری کرنے کا عمل شروع کردیا گیا ہے۔ مروجہ طریقہ کار کے مطابق مسافروں کو نادرا کی پاک آئی ڈی ایپ کے ذریعے رجسٹریشن کرانا ہوگی۔

ایسے افراد جو موبائل ایپ کے ذریعے رجسٹریشن نہیں کرواسکتے وہ نادرا کے ای سہولت مراکز سے بھی رجسٹریشن کی سہولت حاصل کرسکتے ہیں۔

کراچی میں ویکسی نیشن مراکز سے متعلق شکایات

ویکسی نیشن کا ڈیجیٹل نظام شروع ہونے کے باوجود کراچی میں مسافروں کو عملی مشکلات کا سامنا ہے۔ فراہم کردہ معلومات کے مطابق ہزاروں مسافروں کے لیے محدود ویکسی نیشن سہولیات دستیاب ہونے کے باعث بعض مراکز پر رش بڑھ گیا ہے۔

  یہ بھی پڑھیں :پاکستانی عمرہ زائرین کے لیے بڑی خبر، ویزا نظام میں اہم تبدیلی کر دی گئی

وفاقی وزارت صحت نے اولڈ ٹرمینل کے قریب فیڈرل سول ڈسپنسری میں ویکسی نیشن سینٹر قائم کیا ہے تاہم سینٹر میں جگہ محدود ہونے کی وجہ سے مسافروں کو انتظار اور دیگر مشکلات کا سامنا کرنا پڑ رہا ہے۔

مسافروں کا سہولیات بڑھانے کا مطالبہ

مسافروں نے شکایت کی ہے کہ وہ صبح سویرے ویکسی نیشن سینٹر پہنچنے کے باوجود مناسب رہنمائی حاصل نہیں کر پا رہے۔

 بعض مسافروں کے مطابق ان کی پروازیں اگلے چند گھنٹوں میں ہیں لیکن ویکسی نیشن سرٹیفکیٹ کے اجرا میں تاخیر کے باعث انہیں تشویش کا سامنا ہے۔

حکام نے مسافروں کو ہدایت کی ہے کہ بیرون ملک روانگی سے کم از کم 10 روز قبل ویکسی نیشن کے لیے رجوع کریں تاکہ ضروری کارروائی بروقت مکمل ہوسکے۔

مزید مراکز قائم کرنے کا مطالبہ

عمرہ زائرین اور دیگر مسافروں نے مطالبہ کیا ہے کہ ویکسی نیشن مراکز کی تعداد میں اضافہ کیا جائے اور موجودہ مراکز پر عملے، جگہ اور دیگر سہولیات کو بہتر بنایا جائے۔

حکام کی جانب سے بغیر ویکسی نیشن سفر کی تاریخ میں توسیع کے بعد عمرہ زائرین کو ویکسین لگوانے اور ڈیجیٹل سرٹیفکیٹ حاصل کرنے کے لیے اضافی مہلت مل گئی ہے  تاہم مسافروں کے مطابق مراکز پر بڑھتے ہوئے رش کو کم کرنے کے لیے مزید انتظامات کی ضرورت ہے۔