پی ٹی آئی نے گورنر راج کیلئے درکار تمام جواز فراہم کردیئے،اختیار ولی

 وزیراعظم شہباز شریف کے کوآرڈینیٹر اختیار ولی نے کہا ہے کہ خیبرپختونخوا میں گورنر راج کے لیے درکار  تمام جواز تحریک انصاف کی جانب سے فراہم کیے جا چکے ہیں، جبکہ صوبے میں موجودہ صورتحال برقرار رہی تو وسط مدتی انتخابات کی طرف جانا پڑ سکتا ہے۔

اختیار ولی نے یہ بات نجی ٹی وی کے پروگرام میں گفتگو کرتے ہوئے کہی، ان کا کہنا تھا کہ وزیراعلیٰ خیبرپختونخوا سہیل آفریدی ایک احتجاج بھی نہیں کر سکے، اس لیے وفاقی حکومت ان سے خوف زدہ کیوں ہوگی۔

اختیار ولی کا کہنا تھا کہ گورنر راج کے لیے جن عناصر کی ضرورت ہوتی ہے وہ سب پی ٹی آئی دے چکی ہے،گورنر راج نافذ ہو یا نہ ہو، اصل ضرورت خیبرپختونخوا کے حالات بہتر بنانے کی ہے، اس سے قبل انہوں نے ایک الگ پریس کانفرنس میں بھی کہا تھا  کہ گورنر راج ایک آپشن ہوسکتا ہے، تاہم صوبے کے حالات میں بہتری لانا بنیادی ضرورت ہے۔

یہ بھی پڑھیں :سیاسی جماعتیں اتفاقِ رائے سے نئے صوبوں کا حل نکال سکتی ہیں: اختیار ولی

وزیراعظم کے کوآرڈینیٹر نے گفتگو میں کہا کہ خیبرپختونخوا میں موجودہ حالات کے باعث وسط مدتی انتخابات کی طرف جانا پڑے گا،اختیار ولی نے خیبرپختونخوا حکومت کی جانب سے اخراجات اور فنڈز کے استعمال پر بھی سوال اٹھایا، ان کا کہنا تھا کہ اگر صوبائی حکومت پیسہ خرچ کر رہی ہے تو اس کے نتائج بھی نظر آنے چاہئیں۔

انہوں نے وزیراعلیٰ سہیل آفریدی پر غلط بیانی کا الزام عائد کرتے ہوئے کہا کہ صرف یہ کہنا کافی نہیں کہ وفاقی حکومت فنڈز فراہم نہیں کر رہی،اختیار ولی کا کہنا تھا کہ اگر خیبرپختونخوا حکومت فورسز کو مطلوبہ وسائل اور اسلحہ فراہم کرتی تو سکیورٹی اہلکاروں کی شہادتوں کی صورتحال مختلف ہوسکتی تھی،انہوں نے کہا کہ صوبائی حکومت کا یہ مؤقف اب قابل قبول نہیں کہ وفاقی حکومت پیسہ فراہم نہیں کر رہی۔

یہ بھی پڑھیں :وزیراعلیٰ خیبر پختونخوا شدید ذہنی دباؤ کا شکار، دو مرتبہ استعفیٰ تحریر کر چکے،اختیار ولی کا دعویٰ

خیبرپختونخوا میں امن و امان کی صورتحال وفاق اور صوبے کے درمیان سیاسی تنازع کا ایک اہم موضوع بن چکی ہے، وفاقی حکومتی نمائندے صوبائی حکومت سے سکیورٹی اور وسائل کے استعمال پر سوالات اٹھا رہے ہیں۔

خیبرپختونخوا میں گورنر راج، امن و امان، پولیس ایکٹ اور سیاسی احتجاج کے معاملات پر وفاقی حکومت اور پی ٹی آئی کے درمیان بیانات کا سلسلہ جاری ہے۔ وفاقی حکومت گورنر راج کو ایک ممکنہ آپشن قرار دے رہی ہے۔