پشاور، لیڈی ریڈنگ ہسپتال سے نومولود بچہ اغوا

لیڈی ریڈنگ ہسپتال پشاور سے نومولود بچے کے اغوا کا واقعہ سامنے آگیا، پولیس کے مطابق رات 11 بجے برقع پوش خاتون لیبر روم سے نومولود کو لے گئی۔

بچے کی نانی کے مطابق زچہ کی طبیعت خراب ہونے پر اسے دوسرے روم میں لے جایا گیا، بعد ازاں واپس لیبر روم پہنچے تو بچہ وہاں موجود نہیں تھا۔

نانی کا کہنا ہے کہ بچے کی گمشدگی کے بعد ہسپتال میں تلاش شروع کی گئی، جبکہ پولیس نے بھی واقعے کی تحقیقات شروع کردی ہیں۔

پولیس کے مطابق واقعے کی سی سی ٹی وی فوٹیج بھی سامنے آگئی ہے، جس میں برقع پوش خاتون کو بچے کو لے جاتے ہوئے دیکھا جاسکتا ہے۔

یہ بھی پڑھیں: قیامت خیز آتشزدگی سے پشاور لرز اٹھا! لاہوری گیٹ جلتا رہا اور حکمران سوتے رہے, تاجروں کو ایک ہی جھٹکے نے روڈ پر لا کھڑا کر دیا

لیڈی ریڈنگ ہسپتال کے ترجمان محمد عاصم کے مطابق واقعے کی سی سی ٹی وی فوٹیج پولیس کو فراہم کردی گئی ہے، جس کی مدد سے مبینہ طور پر بچے کو لے جانے والی خاتون کی تلاش جاری ہے۔

ترجمان کے مطابق متاثرہ خاندان نے تاحال ایف آئی آر درج نہیں کرائی۔

محمد عاصم نے بتایا کہ مذکورہ خاتون متاثرہ والدین کی رضامندی سے لیبر روم میں آتی جاتی رہی تھی، جبکہ والدین کی جانب سے عملے کو بھی بتایا گیا تھا کہ خاتون ان کے ساتھ ہے اور اسے آنے جانے دیا جائے۔

پولیس کی جانب سے واقعے کی تحقیقات جاری ہیں جبکہ سی سی ٹی وی فوٹیج کی مدد سے بچے کو لے جانے والی خاتون کی شناخت اور تلاش کی جارہی ہے۔