بجلی کی قیمتوں میں بڑی کمی متوقع

وفاقی حکومت نے زرعی اور صنعتی صارفین کے لیے طویل المدتی ریلیف پیکیج تیار کر لیا ہے، جس کے تحت آئندہ تین سال کے لیے بجلی کی قیمتوں میں نمایاں کمی متوقع ہے۔

میڈیا رپورٹس کے مطابق پاور ڈویژن کی جانب سے تیار کردہ اس پیکیج میں بجلی کی قیمت 3 سال کے لیے 14 روپے فی یونٹ تک کم کیے جانے کی تجویز دی گئی ہے۔ منصوبے کے تحت زرعی اور صنعتی صارفین کے لیے بجلی کی قیمت 23 روپے 50 پیسے فی یونٹ تک مقرر کیے جانے کا امکان ظاہر کیا جا رہا ہے۔

ذرائع کے مطابق پاور ڈویژن نے یہ 3 سالہ ریلیف پیکیج مکمل طور پر تیار کر کے منظوری کے لیے وزیراعظم کو بھجوانے کا فیصلہ کیا ہے۔ تجویز کے مطابق، اضافی بجلی کے استعمال پر زرعی اور صنعتی صارفین کے لیے نرخ 22 روپے سے 23 روپے 50 پیسے فی یونٹ کے درمیان ہوں گے۔

فی الحال زرعی صارفین 38 روپے اور صنعتی صارفین 34 روپے فی یونٹ کے حساب سے ادائیگی کر رہے ہیں، اس اعتبار سے مجوزہ پیکیج سے انہیں خاطر خواہ ریلیف حاصل ہوگا۔

یہ بھی پڑھیں: حکومت کا زرعی و صنعتی صارفین کے لیے ریلیف، بجلی کی قیمتوں میں کمی متوقع

ذرائع کے مطابق، وزیراعظم شہباز شریف آئندہ چند روز میں اس پیکیج کا باضابطہ اعلان کریں گے۔ توقع کی جا رہی ہے کہ اس اقدام سے نہ صرف پیداواری لاگت میں کمی آئے گی بلکہ مجموعی طور پر ملک میں مہنگائی کے دباؤ میں بھی کمی واقع ہوگی۔

اقتصادی ماہرین کے مطابق، اگر حکومت اس پیکیج پر عمل درآمد کرتی ہے تو اس سے زرعی پیداوار میں اضافہ، صنعتی ترقی کی رفتار میں بہتری اور برآمدات کے فروغ کے امکانات روشن ہوں گے، جو بالآخر ملکی معیشت پر مثبت اثر ڈالیں گے۔