بابر اعظم نے سعید انور کا ریکارڈ برابر کردیا

پاکستان کرکٹ ٹیم کے اسٹار بیٹر بابر اعظم نے لیجنڈ اوپنر سعید انور کا اہم ریکارڈ برابر کردیا ہے۔

سری لنکا کے خلاف راولپنڈی کرکٹ اسٹیڈیم میں کھیلے گئے میچ کے دوران بابر اعظم نے ایک روزہ کرکٹ میں اپنی 20ویں سنچری مکمل کی، جس کے ساتھ ہی وہ سعید انور کے برابر آگئے ہیں جن کے پاس بھی 20 سنچریوں کا ریکارڈ موجود تھا۔

بابر اعظم نے یہ سنچری طویل انتظار کے بعد اسکور کی، کیونکہ وہ ایک روزہ کرکٹ میں گزشتہ 2 سال اور 2 ماہ یعنی 807 دن سے سنچری نہیں بنا سکے تھے۔ اس سنچری نے نہ صرف اس وقفے کو ختم کیا بلکہ انہیں پاکستان کے عظیم ترین بیٹرز کی فہرست میں مزید نمایاں مقام دلایا۔

اعداد و شمار کے مطابق بابر اعظم اب تک 31 برس کی عمر میں 10 سالہ کیرئیر کے دوران 138 ایک روزہ میچز میں 135 اننگز کھیل چکے ہیں، جن میں وہ 20 سنچریاں اور 37 نصف سنچریاں اسکور کر چکے ہیں۔ ان کا یہ کارنامہ کم مدت میں غیر معمولی مستقل مزاجی اور شاندار بیٹنگ فارم کی واضح مثال ہے۔

یہ بھی پڑھیں: شاہین آفریدی نے شائقین کرکٹ سے بڑا مطالبہ کردیا

دوسری جانب پاکستان کے سابق لیجنڈ اوپنر سعید انور نے اپنے 14 سالہ ون ڈے کیرئیر میں 247 میچز کھیل کر 244 اننگز میں 20 سنچریاں اور 43 نصف سنچریاں بنائی تھیں۔ انہوں نے اپنے دور میں بہترین بیٹنگ سے دنیا بھر میں شہرت حاصل کی تھی، تاہم بابر اعظم نے یہ سنگ میل کم میچز اور کم اننگز میں حاصل کر کے نئی تاریخ رقم کر دی ہے۔

بابر اعظم نے اپنے کیرئیر میں اب تک 5 بار صفر پر آؤٹ ہونے کا سامنا کیا ہے، جب کہ سعید انور اپنے ون ڈے کیرئیر میں 15 بار بغیر کوئی رن بنائے پویلین لوٹے تھے۔ یہ اعداد و شمار دونوں کھلاڑیوں کے انداز اور کھیل کی نوعیت کے فرق کو بھی ظاہر کرتے ہیں۔