محکمہ موسمیات کا کہنا ہے کہ پنجاب کے میدانی علاقوں میں اسموگ کی صورتحال بدستور برقرار رہنے کا امکان ہے، خصوصاً لاہور، فیصل آباد، گوجرانوالہ اور ملحقہ اضلاع میں فضائی آلودگی میں کمی کے فوری امکانات نہیں۔ ساتھ ہی صبح اور رات کے دوران چند مقامات پر ہلکی دھند بھی چھا سکتی ہے، جو ٹریفک کی روانی پر اثر انداز ہو سکتی ہے۔
وفاقی دارالحکومت اسلام آباد میں بھی موسم خشک اور سرد رہنے کی توقع ہے۔ بالائی علاقوں، خصوصاً مری اور گلیات میں موسم مزید ٹھنڈا اور خشک رہے گا، جہاں درجہ حرارت میں کمی کے باعث سیاحوں اور مقامی شہریوں کو گرم کپڑوں کے استعمال کی ہدایت کی گئی ہے۔
سندھ، خیبرپختونخوا اور بلوچستان کے بیشتر اضلاع میں بھی موسم خشک اور سرد رہنے کا امکان ظاہر کیا گیا ہے۔ کراچی سمیت صوبہ سندھ کے ساحلی علاقوں میں رات کے وقت سردی کی شدت بڑھ سکتی ہے جبکہ بلوچستان کے شمالی اضلاع میں شدید سردی برقرار رہے گی۔ آزاد کشمیر اور گلگت بلتستان میں بھی موسم سرد، خشک اور جزوی طور پر ابر آلود رہنے کا امکان ہے۔
محکمہ موسمیات کے مطابق گزشتہ 24 گھنٹوں کے دوران ملک کے زیادہ تر علاقوں میں موسم سرد اور خشک رہا جبکہ پہاڑی علاقوں میں شدید سردی ریکارڈ کی گئی۔ پنجاب کے بعض میدانی علاقوں میں ہلکی دھند چھائی رہی جو معمولاتِ زندگی پر جزوی اثر ڈالتی رہی۔
محکمہ موسمیات نے شہریوں کو مشورہ دیا ہے کہ صبح کے وقت سفر کے دوران احتیاط برتی جائے جبکہ اسموگ سے متاثرہ علاقوں میں ماسک کے استعمال اور غیر ضروری سفر سے گریز کیا جائے تاکہ صحت کے مسائل سے محفوظ رہ سکیں۔
By 
