نجی ایئر لائن کا شارجہ سے کراچی آنیوالا کارگو طیارہ لاپتہ،پاک فضائیہ و بحریہ کا سرچ اینڈ ریسکیو آپریشن

 شارجہ سے کراچی آنے والا K-2 ایئرویز کا کارگو طیارہ کراچی کے مغرب میں خلیج کے علاقے میں ریڈار سے لاپتا ہونے کی اطلاعات سامنے آئی ہیں۔

ذرائع کے مطابق کارگو فلائٹ نمبر KTA-1732 شارجہ سے کراچی کے لیے روانہ ہوئی تھی، جو کراچی سے تقریباً 300 کلومیٹر دور خلیج میں ریڈار سے غائب ہوگئی۔

ذرائع کا کہنا ہے کہ دورانِ پرواز طیارے کے پائلٹ نے نیویگیشن مسئلے کی اطلاع دی اور ایئر ٹریفک کنٹرول (اے ٹی سی) سے ہیڈنگ کی درخواست کی جس پر طیارے کو موجودہ سمت برقرار رکھنے کی ہدایت کی گئی۔

ابتدائی رپورٹ کے مطابق طیارہ اچانک دائیں جانب مڑا اور تیزی سے بلندی کھونے لگا۔ رپورٹ میں بتایا گیا ہے کہ طیارے کے نیچے آنے کی رفتار تقریباً 15 ہزار فٹ فی منٹ ریکارڈ کی گئی، جبکہ اے ٹی سی کی متعدد کالز کے باوجود طیارے کی جانب سے کوئی جواب موصول نہیں ہوا۔

ذرائع کے مطابق کراچی کے مغرب میں تقریباً 155 ناٹیکل میل دور طیارہ ریڈار سے غائب ہوگیا۔

However; at time 2121PST aircraft was observed on RADAR rapidly descending and with rapid heading change, subsequently RADAR contact and communication was lost approximately 155 NM west of Karachi.

— Pakistan Airports Authority (@Pk_PAA_Official) July 7, 2026

   کے ٹو ایئر ویز ( K2 Airways )  کی پاکستان کارگو کی بوئنگ 737 پرواز نے پاکستانی وقت کے مطابق رات 9 بج کر 18 منٹ (2118 PST) پر اپنے نیویگیشن سسٹم میں خرابی کی اطلاع دی جس پر کراچی ایریا کنٹرول سینٹر (Karachi ACC) نے فوری طور پر طیارے کی رہنمائی کرتے ہوئے ضروری نیویگیشنل معاونت فراہم کی۔

واقعے کے بعد متعلقہ اداروں نے احتیاطی اقدامات کے تحت سرچ اینڈ ریسکیو (SAR) آپریشن بھی فعال کر دیا۔ آپریشن کی معاونت کے لیے پاک بحریہ کا جنگی جہاز پی این ایس ذوالفقار متاثرہ علاقے کی جانب روانہ کر دیا گیا ہے۔

اس کے علاوہ پاک فضائیہ کا ساب (Saab) طیارہ بولہاری سے جبکہ پاک بحریہ کا اے ٹی آر (ATR) طیارہ تربت سے پرواز کر چکا ہے اور تلاش کی کارروائیوں میں حصہ لے رہا ہے۔

مزید برآں پاکستان نیشنل شپنگ کارپوریشن (PNSC) کے تجارتی جہاز لاہور کو بھی سرچ اینڈ ریسکیو آپریشن میں شامل کر دیا گیا ہے جہاں بحری اور فضائی وسائل مشترکہ طور پر آپریشن جاری رکھے ہوئے ہیں۔

تاحال حکام کی جانب سے کسی جانی نقصان یا طیارے کے حتمی اسٹیٹس کے حوالے سے باضابطہ بیان جاری نہیں کیا گیا جبکہ سرچ اینڈ ریسکیو آپریشن جاری ہے۔