حکومت نے پیٹرول اور ڈیزل پھر مہنگا کردیا

آئل اینڈ گیس ریگولیٹری اتھارٹی (اوگرا) نے پیٹرولیم مصنوعات کی نئی قیمتوں کا اعلان کر دیا ہے، جس کے تحت پیٹرول اور ہائی اسپیڈ ڈیزل کی قیمتوں میں اضافہ کیا گیا ہے۔

اوگرا کے اعلامیے کے مطابق پیٹرول کی قیمت میں 6 روپے 39 پیسے فی لیٹر اضافہ کیا گیا ہے، جس کے بعد پیٹرول کی نئی قیمت 327 روپے 12 پیسے فی لیٹر مقرر کر دی گئی ہے۔

اسی طرح ہائی اسپیڈ ڈیزل کی قیمت میں 7 روپے 83 پیسے فی لیٹر اضافہ کیا گیا ہے، جس کے بعد ڈیزل کی نئی قیمت 375 روپے 4 پیسے فی لیٹر مقرر کی گئی ہے۔

اعلامیے کے مطابق نئی قیمتوں کا اطلاق فوری طور پر کر دیا گیا ہے، جس کے بعد ملک بھر میں پیٹرول پمپس پر صارفین سے نئی مقررہ قیمتوں کے مطابق وصولی کی جائے گی۔حکام کے مطابق پیٹرولیم مصنوعات کی قیمتوں میں ردوبدل عالمی منڈی میں خام تیل کی قیمتوں اور درآمدی لاگت میں ہونے والی تبدیلیوں کے پیش نظر کیا گیا ہے۔

یہ بھی پڑھیں: پیٹرول پمپس کی بندش سے متعلق پاکستان بزنس فورم کا مطالبہ بھی سامنے آگیا

قبل ازیں آل پاکستان پیٹرول پمپس ایسوسی ایشن نے وفاقی وزیر پیٹرولیم علی پرویز ملک کی جانب سے مطالبات کے حل کی یقین دہانی کے بعد ملک گیر ہڑتال مؤخر کرنے کا اعلان کر دیا، جس کے بعد آج رات سے پیٹرول پمپس بند کرنے کی کال واپس لے لی گئی۔

وفاقی وزیر پیٹرولیم علی پرویز ملک کے ہمراہ پریس کانفرنس کرتے ہوئے پیٹرول پمپ اونرز ایسوسی ایشن کے سیکریٹری اطلاعات ندیم خان نے کہا کہ حکومت نے مطالبات پر سنجیدگی سے غور کرنے اور انہیں حل کرنے کی یقین دہانی کرائی ہے، جس کے بعد ہڑتال مؤخر کرنے کا فیصلہ کیا گیا ہے۔ انہوں نے امید ظاہر کی کہ آئندہ دو ہفتوں کے اندر پیٹرولیم ڈیلرز کے مارجن کا معاملہ حل کر لیا جائے گا۔

اس موقع پر پیٹرولیم ڈیلرز کے رکن راجا وسیم نے کہا کہ حکومت نے انہیں آگاہ کیا ہے کہ پیٹرول اور ڈیزل کی قیمتوں کا روزانہ کی بنیاد پر تعین صرف 15 روز کے لیے آزمائشی بنیادوں پر کیا جا رہا ہے۔

ان کا کہنا تھا کہ ڈیلرز شدید مشکلات کے باعث احتجاج جیسے سخت قدم اٹھانے پر مجبور ہوئے، تاہم حکومت اور وزیر پیٹرولیم کے شکر گزار ہیں کہ انہوں نے ان کے تحفظات سنے۔ انہوں نے امید ظاہر کی کہ حکومت دو ہفتوں کے اندر ڈیلرز کے مسائل حل کر دے گی۔