شادی کے بعد نادرا میں ازدواجی حیثیت کیسے تبدیل کریں؟ گھر بیٹھے ریکارڈ اپ ڈیٹ کرنے کا آسان طریقہ

شادی کے بعد نادرا ریکارڈ میں ازدواجی حیثیت تبدیل کروانے کے لیے اب شہریوں کو لازماً نادرا مرکز جانے کی ضرورت نہیں ، نیشنل ڈیٹا بیس اینڈ رجسٹریشن اتھارٹی (نادرا) نے شہریوں کو ازدواجی حیثیت اپ ڈیٹ کرنے کا آسان طریقہ بتا دیا ہے، جس کے تحت یہ عمل نادرا رجسٹریشن سینٹر کے ساتھ ساتھ آن لائن بھی مکمل کیا جا سکتا ہے۔

شادی کے بعد شناختی ریکارڈ میں درست معلومات درج رکھنا اہم ہے۔ اسی لیے نادرا نے اس عمل کو نسبتاً آسان بنایا ہے تاکہ شہری اپنی ازدواجی حیثیت بروقت اپ ڈیٹ کرا سکیں اور مستقبل میں مختلف سرکاری و شناختی خدمات کے دوران مشکلات سے بچ سکیں۔

شادی کے بعد ازدواجی حیثیت تبدیل کرنے کے لیے کیا درکار ہے؟

نادرا کے مطابق ازدواجی حیثیت تبدیل کروانے کے لیے شہری کو سب سے پہلے متعلقہ یونین کونسل، کنٹونمنٹ بورڈ یا میونسپل کمیٹی سے شادی کا کمپیوٹرائزڈ سرٹیفکیٹ حاصل کرنا ہوگا۔

اس کے بعد شادی کے سرٹیفکیٹ پر درج سی آر ایم ایس (CRMS) نمبر کے ہمراہ قریبی نادرا رجسٹریشن سینٹر سے رجوع کیا جا سکتا ہے۔ وہاں ضروری کارروائی مکمل ہونے کے بعد شہری کے نادرا ریکارڈ میں ازدواجی حیثیت اپ ڈیٹ کر دی جاتی ہے۔

گھر بیٹھے نادرا ریکارڈ اپ ڈیٹ کرنے کی سہولت

نادرا نے شہریوں کو گھر بیٹھے ازدواجی حیثیت اپ ڈیٹ کرنے کی سہولت بھی فراہم کر رکھی ہے۔ اس مقصد کے لیے شہری پاک آئی ڈی موبائل ایپ استعمال کر سکتے ہیں۔

یعنی اگر کسی شہری کے لیے نادرا رجسٹریشن سینٹر جانا مشکل ہو تو وہ آن لائن طریقہ اختیار کرتے ہوئے گھر سے ہی اپنی معلومات اپ ڈیٹ کروا سکتا ہے۔ اس سہولت سے شہریوں کا وقت بھی بچتا ہے اور نادرا مرکز جانے کی ضرورت بھی کم ہو جاتی ہے۔

یہ بھی پڑھیں :نادرا کیجانب سے عوام کیلئے بڑی سہولت، ویزا اور بائیومیٹرک تصدیق کا عمل اب اور بھی آسان

نادرا کا شناختی ریکارڈ شہریوں کے لیے مختلف سرکاری اور شناختی خدمات میں استعمال ہوتا ہے ،  اس لیے ذاتی معلومات میں تبدیلی کے بعد ریکارڈ کو درست اور اپ ڈیٹ رکھنا اہم سمجھا جاتا ہے۔

شادی کے بعد ازدواجی حیثیت کا درست اندراج مستقبل میں شناختی معاملات کے دوران معلومات کے تضاد یا غیر ضروری دشواری سے بچنے میں مدد دے سکتا ہے۔ اسی وجہ سے شہریوں کے لیے ضروری ہے کہ وہ اپنی معلومات میں ہونے والی اہم تبدیلیوں کو بروقت ریکارڈ کا حصہ بنائیں۔

جعلی ٹریکنگ آئی ڈیز سے محتاط رہنے کی ہدایت

دوسری جانب نادرا نے شہریوں کو سوشل میڈیا پلیٹ فارمز پر موجود جعلی ٹریکنگ آئی ڈیز اور گمراہ کن معلومات سے بھی محتاط رہنے کی ہدایت کی ہے۔

نادرا ترجمان کے مطابق شہریوں کی ذاتی معلومات کے تحفظ کے لیے سوشل میڈیا پر کمنٹس کے ذریعے ٹریکنگ آئی ڈی فراہم نہیں کی جائے گی ، شہریوں کو واضح ہدایت کی گئی ہے کہ وہ نادرا کے سوشل میڈیا اکاؤنٹس پر کمنٹس میں اپنی ٹریکنگ آئی ڈی ہرگز شیئر نہ کریں،  کسی بھی معاملے میں صرف ادارے کے سرکاری ذرائع اور تصدیق شدہ پلیٹ فارمز سے حاصل ہونے والی معلومات پر اعتماد کریں ۔

ٹریکنگ آئی ڈی یا کیس سے متعلق معلومات حاصل کرنے کے لیے شہری 8400 پر ایس ایم ایس کر سکتے ہیں۔ اس کے علاوہ نادرا ہیلپ لائن 051-111-786-100 یا موبائل فون سے 1777 پر بھی رابطہ کیا جا سکتا ہے۔