عوام کے لیے بڑی خوشخبری، آٹے کی قیمتوں میں کمی کا اعلان

سندھ حکومت نے آٹے کی قیمتوں میں حالیہ اضافے کے بعد عوام کو ریلیف دینے کے لیے اہم فیصلہ کیا ہے۔

 صوبائی وزیر خوراک مخدوم محبوب الزماں کی زیر صدارت فلور ملز ایسوسی ایشن کے ساتھ ہنگامی اجلاس میں آٹے کی ایکس مل قیمت 6 روپے فی کلو کم کرنے پر اتفاق ہوگیا۔

اجلاس میں آٹے کی قیمتوں میں استحکام، گندم کی دستیابی اور فلور ملز کو گندم کی فراہمی کے معاملات پر غور کیا گیا۔ فیصلے کے بعد آٹے کی ایکس مل قیمت 161 روپے سے کم کرکے 155 روپے فی کلو مقرر کردی گئی۔

نئی قیمت 155 روپے فی کلو

حکام کے مطابق آٹے کی قیمت میں کمی کا فیصلہ فلور ملز ایسوسی ایشن کے ساتھ مشاورت کے بعد کیا گیا۔ اجلاس میں اس بات پر بھی تبادلہ خیال ہوا کہ مارکیٹ میں آٹے کی فراہمی برقرار رکھی جائے اور قیمتوں میں غیر ضروری اضافے کو روکا جائے۔

 یہ بھی پڑھیں :ملک کے مختلف شہروں میں آٹے کی قیمت میں ہوشربا اضافہ

اجلاس میں کمشنر کراچی سید حسن نقوی اور سیکریٹری خوراک غلام عباس نائچ نے شرکت کی۔ فلور ملز ایسوسی ایشن کی نمائندگی صدر ملک اقبال اور پیٹرن ان چیف محمد یوسف چوہدری سمیت دیگر عہدیداروں نے کی۔

قیمتوں میں اضافے پر تشویش

صوبائی وزیر خوراک مخدوم محبوب الزماں نے آٹے کی قیمتوں میں اچانک اضافے پر تشویش کا اظہار کیا۔ ان کے مطابق وزیراعلیٰ سندھ اور چیف سیکریٹری نے بھی قیمتوں میں اضافے اور عوام پر اس کے اثرات پر تشویش ظاہر کی ہے۔

وزیر خوراک نے بتایا کہ سندھ حکومت نے محکمہ زراعت کے ذریعے گندم کے کاشتکاروں کو 76 ارب 50 کروڑ روپے کی سبسڈی فراہم کی ہے۔ ان کے مطابق رواں سال صوبے میں گندم کی ریکارڈ پیداوار ہوئی ہے۔

انہوں نے کہا کہ بہتر پیداوار کے فوائد عوام تک پہنچنا ضروری ہیں تاکہ انہیں مناسب قیمت پر آٹا دستیاب ہوسکے۔

گندم کے ذخائر اور فراہمی

مخدوم محبوب الزماں کے مطابق فلور ملز کے پاس اس وقت تقریباً 15 لاکھ ٹن گندم کے ذخائر موجود ہیں۔ یہ ذخائر تقریباً ایک ماہ کی کھپت کے برابر ہیں۔

 یہ بھی پڑھیں :آٹے کی قیمتوں میں اضافہ تھم نہ سکا ،شہری ریلیف کے منتظر

انہوں نے کہا کہ گندم کے دستیاب ذخائر اور سپلائی کے نظام کو مؤثر انداز میں منظم کرنا ضروری ہے۔ اس سے آٹے کی فراہمی برقرار رکھنے اور قیمتوں پر غیر ضروری دباؤ کم کرنے میں مدد مل سکتی ہے۔

حکومت اور فلور ملز ایسوسی ایشن کے درمیان طے پانے والے فیصلے کے تحت ایکس مل قیمت میں کمی کی گئی ہے۔ تاہم خوردہ بازار میں آٹے کی قیمت دکانوں اور فروخت کے طریقۂ کار کے لحاظ سے مختلف ہوسکتی ہے۔