سعودی عرب جانے کے خواہمشد ہنرمند پاکستانیوں کے لیے بڑی خوشخبری

سعودی عرب نے ہنرمند غیر ملکی کارکنوں کے لیے ویزا پالیسی میں اہم سہولت متعارف کرانے کا اعلان کیا ہے۔

نئے طریقہ کار کے تحت اہل کارکن اپنے ورک ویزے کی کارروائی کے ساتھ اہلِ خانہ کے داخلے کے ویزوں کا عمل بھی مکمل کروا سکیں گے۔

سعودی پریس ایجنسی (ایس پی اے) کے مطابق اس اقدام پر وزارتِ خارجہ اور وزارتِ انسانی وسائل و سماجی ترقی نے مشترکہ طور پر کام کیا ہے۔ اس سہولت کا مقصد اہل شرائط پر پورا اترنے والے غیر ملکی کارکنوں کے خاندانوں کے ویزا عمل کو آسان بنانا ہے۔

کن اہلِ خانہ کو سہولت ملے گی؟

ایس پی اے کے مطابق اس سہولت میں کارکن کی اہلیہ یا شوہر، 25 سال سے کم عمر بیٹے اور غیر شادی شدہ بیٹیاں شامل ہیں۔ اہل کارکن اپنے ورک ویزے کے مراحل مکمل ہونے کے ساتھ ہی زیرِ کفالت اہلِ خانہ کے انٹری ویزوں کی کارروائی بھی کروا سکیں گے۔

 یہ بھی پڑھیں :سعودی عرب کے ساتھ تعلقات کئی دہائیوں سے ہیں، ڈی جی آئی ایس پی آر کی پاکستانی فوجی دستوں کی سعودیہ میں موجودگی کی تصدیق

اس طریقہ کار کے تحت خاندان کے افراد کے ویزوں کے لیے الگ سے طویل انتظار کی ضرورت کم ہوسکتی ہے۔ تاہم اس سہولت سے فائدہ اٹھانے کے لیے متعلقہ شرائط اور اہلیت پوری کرنا ضروری ہوگا۔

سعودی عرب پہنچنے کے بعد کیا ہوگا؟

سعودی خبررساں ایجنسی کے مطابق اہلِ خانہ کے مملکت پہنچنے کے بعد ان کی رہائش سے متعلق کارروائی مکمل کی جائے گی۔ یہ عمل سعودی عرب میں نافذ قوانین اور ضوابط کے مطابق ہوگا۔

اس طرح ورک ویزا حاصل کرنے والے اہل غیر ملکی کارکن اپنے خاندان کو ساتھ بلانے کے عمل کو زیادہ مربوط انداز میں مکمل کرسکیں گے۔ تاہم دستیاب رپورٹ میں درخواست دینے کے مخصوص طریقہ کار، فیس اور اس سہولت کے اطلاق کی حتمی تاریخ کی تفصیلات نہیں دی گئیں۔