لاہور میں پہلے شاپنگ فیسٹیول کے انعقاد کا اعلان

وزیر اعلیٰ پنجاب مریم نواز شریف نے لاہور کے پہلے شاپنگ فیسٹیول کے منصوبوں کا اعلان کرتے ہوئے کہا ہے کہ معاشی سرگرمیوں کو فروغ دینے کے لیے کاروبار دوست پالیسیاں بہت اہم ہیں۔

تفصیلات کے مطابق لاہور میں پہلے شاپنگ فیسٹیول کا انعقاد چین اسٹورز کے اشتراک سے منعقد کیا جا رہا ہے۔ چین سٹور ایسوسی ایشن آف پاکستان کے ایک وفد سے ملاقات کے دوران، وزیر اعلی پنجاب نے کہا کہ پنجاب میں سٹور آپریٹنگ اوقات کے لیے سالانہ کیلنڈر قائم کرنے کی تجویز کا جائزہ لیا۔

اجلاس میں صوبے بھر میں شاپنگ فیسٹیول کے انعقاد کا اصولی فیصلہ بھی کیا گیا۔ وزیر اعلی پنجاب نے کہا کہ ان کا مقصد کاروباری برادری کے ساتھ مل کر کام کرنا ہے۔ کاروبار کے فروغ کے لیے عملی تجاویز پر عمل درآمد یقینی بنانا ہے۔

انہوں نے مزید کہا کہ میں دل سے پاکستانی ہوں اور فخر سے پاکستانی برانڈز استعمال کرتی ہوں۔ وزیراعلیٰ نے لاہور میں ہارس اینڈ کیٹل شو کو نئے انداز میں بحال کرنے کا بھی اعلان کیا۔ وفد نے صوبے میں کاروباری ترقی کو تیز کرنے کے لیے مختلف خیالات کا اظہار کیا۔

علاوہ ازیں وزیراعلیٰ مریم نواز نے جیلانی پارک میں کرسنتھیمم کی سالانہ نمائش کا افتتاح کیا، کرسنتھیمم سے بنائے گئے تخلیقی ڈسپلے کا معائنہ کیا۔ پارکس اینڈ ہارٹیکلچر اتھارٹی کے ڈائریکٹر جنرل محمد طاہر وٹو نے انہیں 10 روزہ تقریب کے بارے میں بریفنگ دی، جس میں کرسنتھیمم کی 200 کے قریب اقسام کی نمائش کی گئی تھی۔ ایک لائٹ شو ہر شام نمائش کی تکمیل کرے گا۔