قومی کرکٹ ٹیم کے لیفٹ آرم سپنر نعمان علی نے بڑا اعزاز اپنے نام کرلیا۔
لاہور کے قذافی سٹیڈیم میں کھیلے جارہے ٹیسٹ میں نعمان علی نے جنوبی افریقا کیخلاف چھ وکٹیں حاصل کی ہیں اور یہ نواں موقع تھا جب انہوں نے ٹیسٹ کرکٹ میں پانچ یا اس سے زیادہ وکٹیں حاصل کیں۔
نعمان علی پاکستان کی جانب سے سب سے زیادہ پانچ وکٹیں حاصل کرنے والے لیفٹ آرم سپنر بن گئے ہیں۔
اس سے قبل یہ اعزاز اقبال قاسم کے پاس تھا جنہوں نے آٹھ مرتبہ ٹیسٹ کرکٹ میں پانچ یا اس سے زائد وکٹیں حاصل کی تھیں۔
وسیم اکرم پاکستان کی جانب سے سب سے زیادہ ٹیسٹ “پانچ وکٹیں” (Five-fers) لینے کا ریکارڈ رکھتے ہیں، جن کی تعداد 25 ہے۔ ان کے بعد عمران خان (23) اور وقار یونس (22) کا نمبر آتا ہے۔
39 سالہ نعمان علی کی اس فہرست میں تیزی سے اوپر آنا اور ٹاپ پر پہنچنا اس لیے بھی زیادہ قابلِ تحسین ہے کہ انہوں نے پاکستان کے لیے اپنا ڈیبیو 34 سال کی عمر میں 2021 میں کیا تھا ، تب سے نعمان علی نے خاص طور پر ہوم کنڈیشنز میں خود کو ایک میچ ونر کے طور پر منوایا ہے۔ وہ اکثر اہم شراکتیں توڑتے ہیں اور اپنی درست اور جارحانہ بولنگ کے ذریعے میچ کا رخ موڑ دیتے ہیں حتیٰ کہ بے جان وکٹوں پر بھی وہ غیرمعمولی باؤنس اور ٹرن حاصل کرنے کی صلاحیت رکھتے ہیں، جو انہیں خاص طور پر ایشیا کی وکٹوں پر ایک انمول اثاثہ بنا دیتا ہے۔
جولائی 2023 سے اب تک اگر دیکھا جائے تو وہ ٹیسٹ کرکٹ میں شاید دنیا کے بہترین باؤلر رہے ہیں ، اس عرصے میں انہوں نے صرف 15.21 کی اوسط سے 52 وکٹیں حاصل کیں، جو کہ اس مدت کے دوران (ان باؤلرز میں جو کم از کم 30 وکٹیں لے چکے ہیں) بہترین اعداد و شمار ہیں۔ یہ ان کی عالمی سطح پر بہترین پوزیشن اور اعلیٰ کارکردگی کو واضح کرتے ہیں۔
By 
