سست انٹرنیٹ سے پریشان صارفین کے لئے بڑی خوشخبری

پاکستان ٹیلی کمیونیکیشن کمپنی لمیٹڈ (پی ٹی سی ایل) نے اعلان کیا ہے کہ زیرِ سمندر انٹرنیٹ کیبل میں پیدا ہونے والی خرابی کی مرمت مکمل کر لی گئی ہے۔ کمپنی کے مطابق کیبل میں موجود ریپیٹر کی مرمت کامیابی سے انجام دے دی گئی ہے، جس کے بعد ملک بھر میں انٹرنیٹ کی رفتار اور رابطوں کی حالت میں بہتری آئی ہے۔

پی ٹی سی ایل کے ترجمان نے کہا کہ خرابی کی مرمت کا عمل تکنیکی ماہرین کی زیرِ نگرانی مکمل کیا گیا۔ کمپنی کے مطابق، متاثرہ کیبل کی بحالی سے انٹرنیٹ ٹریفک معمول پر آ رہی ہے اور صارفین کو پہلے کی نسبت بہتر کنیکٹیویٹی حاصل ہو رہی ہے۔

تاہم، ملک کے کچھ علاقوں میں انٹرنیٹ کی رفتار اب بھی کم ہے، جس کی وجہ سے صارفین کو خاص طور پر سوشل میڈیا ایپس پر ویڈیوز اپ لوڈ اور ڈاؤن لوڈ کرنے میں مشکلات کا سامنا ہے۔ کئی صارفین نے سوشل میڈیا پر شکایت کی ہے کہ مرمت کے باوجود ان کے علاقوں میں رفتار متاثر ہے، خصوصاً شام کے اوقات میں نیٹ ورک سست پڑ جاتا ہے۔

یہ بھی پڑھیں: ملک میں انٹرنیٹ سروس سست روی کا شکار ، پی ٹی سی ایل نے تصدیق کردی

انٹرنیٹ کے ماہرین کا کہنا ہے کہ زیرِ سمندر کیبل میں خرابی کے باعث پاکستان سمیت خطے کے کئی ممالک میں ڈیٹا ٹریفک متاثر ہوا تھا، جس کے اثرات مکمل طور پر ختم ہونے میں کچھ وقت لگ سکتا ہے۔

پاکستان میں انٹرنیٹ صارفین کی تعداد میں تیزی سے اضافہ ہو رہا ہے، اور سوشل میڈیا کے بڑھتے ہوئے استعمال کے ساتھ ساتھ ای کامرس اور آن لائن تعلیم کے فروغ نے بہتر انٹرنیٹ سہولیات کی ضرورت کو مزید بڑھا دیا ہے۔ بڑے شہروں میں انٹرنیٹ سروس میں بہتری کے اقدامات کیے جا رہے ہیں، تاہم عام شہریوں کا کہنا ہے کہ انٹرنیٹ کی رفتار اکثر سست رہتی ہے اور بڑھتی ہوئی مہنگائی کے باعث پیکجز کی قیمتیں ان کے لیے ناقابلِ برداشت ہو چکی ہیں۔

موبائل انٹرنیٹ صارفین نے بھی پیکجز کی بڑھتی ہوئی قیمتوں پر ناپسندیدگی کا اظہار کرتے ہوئے کہا ہے کہ قیمتیں تو بڑھ رہی ہیں مگر معیار میں کوئی نمایاں بہتری نہیں آئی۔ صارفین کے مطابق، ملک میں انٹرنیٹ کی دستیابی اور معیار دونوں میں اب بھی خاطرخواہ بہتری کی ضرورت ہے تاکہ عوام کو مستحکم اور تیز رفتار سہولت میسر آ سکے۔

یہ بھی پڑھیں: انٹرنیٹ سروس دوبارہ معطل کرنے کی تجویز پر غور