انڈونیشیا میں 6.2 شدت کا خوفناک زلزلہ، عمارتیں لرز اٹھیں، سونامی کا خدشہ

انڈونیشیا کے جزیرے سولاویسی میں 6.2 شدت کا طاقتور زلزلہ ریکارڈ کیا گیا ہے، جس کے نتیجے میں ساحلی علاقوں میں خوف و ہراس پھیل گیا۔ تاہم حکام نے واضح کیا ہے کہ زلزلے کے بعد کسی سونامی کی وارننگ جاری نہیں کی گئی۔

یہ بھی پڑھیں:افغانستان میں 6.3 شدت کا زلزلہ : عمارتیں منہدم ، 20 افراد جاں بحق

انڈونیشین میٹرو لوجیکل اور جیو فزیکل ایجنسی کے مطابق زلزلے کا مرکز سولاویسی کے ساحلی حصے کے قریب تھا، جبکہ زلزلے کی گہرائی تقریباً 105 کلومیٹر ریکارڈ کی گئی۔ گہرائی زیادہ ہونے کے باعث جھٹکوں کی شدت سطح زمین پر نسبتاً کم رہی، مگر پھر بھی لوگوں میں شدید گھبراہٹ دیکھنے میں آئی۔

کوئی جانی نقصان رپورٹ نہیں ہوا

ریسکیو اور مقامی انتظامیہ کے مطابق فوری طور پر کسی جانی یا مالی نقصان کی اطلاع موصول نہیں ہوئی۔ کئی علاقوں میں لوگ گھروں اور عمارتوں سے باہر نکل آئے جبکہ بعض مقامات پر معمول کی سرگرمیاں کچھ دیر کے لیے معطل رہیں۔

آفٹر شاکس کا خدشہ، عوام کو احتیاط کی ہدایت

حفاظتی اداروں نے شہریوں کو ہدایت کی ہے کہ زلزلے کے بعد ممکنہ آفٹر شاکس کے پیش نظر ہوشیار رہیں اور عمارتوں کی کمزور دیواروں یا ڈھانچوں کے قریب جانے سے گریز کریں۔ حکام نے کہا کہ مانیٹرنگ سسٹم مسلسل صورتِ حال پر نظر رکھے ہوئے ہے۔

مزید پڑھیں:ترکیہ میں ایک بار پھر خوفناک زلزلہ : عمارتوں کو شدید نقصان

چند ہفتے قبل 6.6 شدت کا زلزلہ بھی آیا تھا

واضح رہے کہ چند ہفتے قبل بھی سولاویسی کے قریب 6.6 شدت کا زلزلہ آیا تھا، جس کے بعد علاقے میں زلزلہ خیزی بڑھنے کے خدشات ظاہر کیے گئے تھے۔ انڈونیشیا پیسفک ’رِنگ آف فائر‘ میں واقع ہونے کے باعث دنیا کے سب سے زیادہ زلزلہ خیز ممالک میں شمار ہوتا ہے۔

حکام نے کہا ہے کہ کسی بھی ہنگامی صورتحال میں ریسکیو ٹیمیں مکمل طور پر تیار ہیں، جب کہ عوام کو مستند ذرائع سے معلومات حاصل کرنے کی ہدایت کی گئی ہے۔