وفاقی وزارت مذہبی امور نے حج کے خواہشمند عازمین کو ہدایت جاری کی ہے کہ وہ سعودی ویزا بائیو ایپ کے ذریعے اپنی بائیومیٹرک تصدیق کا عمل فوری طور پر مکمل کریں۔ وزارت نے واضح طور پر خبردار کیا ہے کہ حج ویزا کے حصول کے لیے بائیومیٹرک اندراج لازمی قرار دیا گیا ہے اور مقررہ طریقہ کار پر عمل نہ کرنے کی صورت میں ویزا جاری نہیں کیا جائے گا۔
وزارت مذہبی امور کے مطابق حج ویزا کی درخواست کے لیے عازمین کے پاس ایک فعال ای میل ایڈریس ہونا ضروری ہے، جس کے ذریعے بائیومیٹرک تصدیق اور ویزا سے متعلق تمام معلومات فراہم کی جائیں گی۔ اس کے علاوہ پاسپورٹ کی واضح اسکین کاپی سعودی ویزا بائیو ایپ میں اپ لوڈ کرنا بھی لازمی ہوگا۔ وزارت نے بتایا ہے کہ عازمین کا پاسپورٹ کم از کم 26 نومبر 2026 تک قابلِ استعمال ہونا چاہیے، بصورت دیگر درخواست قابلِ قبول نہیں ہوگی۔
ہدایات میں یہ بھی کہا گیا ہے کہ ویزا کے اجرا کے لیے عازمین کو سفارتخانہ منتخب کرتے وقت اسلام آباد کا انتخاب کرنا ہوگا۔ بائیومیٹرک عمل کے دوران چہرے کی اسکیننگ کے ساتھ ساتھ انگلیوں کے نشانات بھی لیے جائیں گے، تاکہ شناخت کے تمام مراحل مکمل کیے جا سکیں۔
وزارت مذہبی امور نے اوورسیز پاکستانیوں کو بھی خصوصی ہدایات جاری کی ہیں کہ وہ سعودی ایپ میں رجسٹریشن کے دوران لوکیشن کے خانے میں پاکستان کا انتخاب کریں۔ اس اقدام کا مقصد ڈیٹا کی درستگی اور ویزا کے اجرا میں کسی بھی ممکنہ رکاوٹ سے بچاؤ ہے۔
بیان میں عازمین کو یہ بھی تاکید کی گئی ہے کہ بائیومیٹرک تصدیق مکمل ہونے کے بعد موصول ہونے والی تصدیقی ای میل کا پرنٹ ضرور حاصل کریں اور اسے اپنے پاس محفوظ رکھیں، کیونکہ یہ دستاویز ویزا کے عمل اور بعد کے مراحل میں اہم ثابت ہو سکتی ہے۔ وزارت نے عازمین سے اپیل کی ہے کہ وہ مقررہ ہدایات پر بروقت عمل کریں تاکہ حج ویزا کے اجرا میں کسی قسم کی تاخیر یا دشواری کا سامنا نہ کرنا پڑے۔
By 
