عمران خان سے خفیہ ڈیل کی خبروں پر بڑا اعلان، عطا تارڑ کا دو ٹوک مؤقف سامنے آگیا

وفاقی وزیرِ اطلاعات عطا تارڑ نے ایک بار پھر بانی پی ٹی آئی عمران خان سے مبینہ ڈیل کی خبروں کو سختی سے مسترد کرتے ہوئے واضح پیغام دیا ہے کہ حکومت کسی قسم کی رعایت دینے یا پسِ پردہ مفاہمت کرنے کے عمل میں شامل نہیں ہے۔

اسلام آباد میں ذرائع ابلاغ کے نمائندوں سے گفتگو کرتے ہوئے عطا تارڑ نے دو ٹوک الفاظ میں کہا کہ عمران خان کے حوالے سے نہ کوئی ڈیل ہے اور نہ ہی کوئی ڈھیل ہے۔ انہوں نے کہا کہ بعض حلقے دانستہ طور پر افواہیں پھیلا کر سیاسی ماحول کو کشیدہ کرنا چاہتے ہیں، مگر حکومت آئین اور قانون کے مطابق اپنا کردار ادا کر رہی ہے۔

یہ بھی پڑھیں:ہم نے عمران خان کو بات چیت کیلئے تیار کیا، بات چیت کو ڈیل سے تعبیر نہ کیا جائے، اعظم سواتی کا ویڈیو پیغام

وزیرِ اطلاعات نے کہا کہ عمران خان عدالتوں سے سزا یافتہ ہیں اور ان کے مقدمات کا فیصلہ معزز عدلیہ نے کیا ہے۔ ایسے میں کسی قسم کی رعایت کا تاثر دینا حقائق کے منافی ہے۔ انہوں نے زور دے کر کہا کہ قانون سب کے لیے برابر ہے اور حکومت عدالتی فیصلوں پر مکمل عملدرآمد کی پابند ہے۔

عطا تارڑ نے کہا کہ رعایت یا مفاہمت سے متعلق خبریں بے بنیاد اور من گھڑت ہیں، ان میں کوئی صداقت نہیں۔ ان کا کہنا تھا کہ بعض عناصر سوشل میڈیا پر قیاس آرائیاں کر کے سیاسی فائدہ اٹھانا چاہتے ہیں، لیکن عوام کو گمراہ نہیں کیا جا سکتا۔

انہوں نے دو روز قبل بھی ایسی خبروں کی تردید کرتے ہوئے اپوزیشن جماعتوں کو تنبیہ کی تھی کہ عمران خان کی صحت کے معاملے پر سیاست نہ کی جائے۔ وزیرِ اطلاعات کا کہنا تھا کہ اگر کسی قیدی کو طبی سہولیات درکار ہوں تو قانون کے مطابق فراہم کی جاتی ہیں، اس معاملے کو سیاسی رنگ دینا مناسب نہیں۔

مزید پڑھیں:کوئی ڈیل نہیں ہوگی، فوج کا عمران خان سے مذاکرات سے انکار،گارڈین اخبار کی رپورٹ

سیاسی تجزیہ کاروں کا کہنا ہے کہ حالیہ دنوں میں بانی پی ٹی آئی سے متعلق قیاس آرائیوں میں تیزی آئی تھی، جس کے بعد حکومت کی جانب سے بار بار وضاحت دی جا رہی ہے تاکہ ابہام ختم کیا جا سکے۔ حکومتی حلقوں کا مؤقف ہے کہ ریاستی ادارے اپنی آئینی حدود میں رہ کر کام کر رہے ہیں اور کسی بھی قسم کی خفیہ مفاہمت کا سوال ہی پیدا نہیں ہوتا۔

دوسری جانب اپوزیشن کی جانب سے مختلف بیانات سامنے آ رہے ہیں، تاہم حکومت کا مؤقف واضح ہے کہ نہ کوئی ڈیل ہو رہی ہے اور نہ ہی کسی قسم کی رعایت دی جا رہی ہے۔

ذرائع کے مطابق حکومت کی پالیسی یہی ہے کہ تمام معاملات عدالتوں میں طے ہوں گے اور قانونی عمل مکمل شفافیت کے ساتھ جاری رہے گا۔