حکومتِ پنجاب نے اساتذہ کو سفری سہولتوں میں بہتری اور اخراجات میں کمی کے لیے “ای بائیک اسکیم” متعارف کرانے کا فیصلہ کیا ہے، جس کے تحت اساتذہ ماہانہ صرف 3,600 روپے کی قسط میں الیکٹرک بائیک حاصل کر سکیں گے۔
اس اسکیم کا مقصد صوبہ بھر کے اساتذہ کو سستی، موثر اور ماحول دوست ٹرانسپورٹ فراہم کرنا ہے۔ حکومت پنجاب نے اس اقدام کے تحت 2 لاکھ سے 2.5 لاکھ روپے تک کی قیمت والے ای بائیک پر 30 سے 40 فیصد سبسڈی دینے کا فیصلہ کیا ہے۔ اس سبسڈی کے بعد اساتذہ کو بقیہ رقم 2 سے 3 سال کی آسان اقساط میں ادا کرنی ہوگی۔
رپورٹس کے مطابق اس اسکیم کے تحت اساتذہ کو ماہانہ 3,600 روپے سے 4,200 روپے کی قسط ادا کرنی ہوگی، جو کہ ان کے لیے ایک بڑا ریلیف ثابت ہو گا۔
پنجاب حکومت کی جانب سے سی ایم پنجاب ای بائیک ٹیچر اسکیم کے لیے جلد آن لائن درخواستوں کا آغاز کیا جائے گا۔ اساتذہ پنجاب ٹیچرز فاؤنڈیشن کی ویب سائٹ کے ذریعے اپنی درخواستیں جمع کر سکیں گے۔
امیدواروں کو اپنی شناختی کارڈ (CNIC)، سروس سرٹیفکیٹ، درست ڈرائیونگ لائسنس اور پاسپورٹ سائز تصویر فراہم کرنا ہوگی۔ درخواست مکمل ہونے پر ویریفیکیشن سلپ ڈاؤن لوڈ کی جا سکے گی، اور اہل امیدواروں کو ایس ایم ایس یا ای میل کے ذریعے آگاہ کیا جائے گا۔
یہ اسکیم اساتذہ کے لیے ایک بڑی سہولت ثابت ہو گی، جس سے نہ صرف ان کے سفر کے اخراجات میں کمی آئے گی بلکہ وہ ایک ماحولیاتی طور پر دوستانہ اور جدید ٹرانسپورٹ کے ذریعے اپنی منزل تک پہنچ سکیں گے۔
By 
