بیلٹ اینڈ روڈ پویلین، پاکستانی مصنوعات کو عالمی مارکیٹ تک رسائی کا نیا پلیٹ فارم

چین کے شہر وہان میں بیلٹ اینڈ روڈ انیشیٹو کے تحت 25 ممالک کی مصنوعات پر مشتمل ایک مشترکہ پویلین قائم کیا گیا ہے، جس میں پاکستان کا پویلین بھی شامل ہے۔

اس پویلین میں مختلف ممالک کی مصنوعات نمائش کے لیے رکھی گئی ہیں جبکہ انہیں لائیو سٹریمنگ کے ذریعے آن لائن فروخت بھی کیا جا رہا ہے۔

یہ بھی پڑھیں :چین کا گرین ماڈل، پاکستان کیلئے ماحولیاتی اور زرعی انقلاب کی نئی راہ

پاکستان پویلین کے انچارج پاکستانی شہری حارث نے وفد کو بریفنگ دیتے ہوئے بتایا کہ یہ پویلین گزشتہ ایک سال سے فعال ہے اور اس کا بنیادی مقصد پاکستان کی مصنوعات کو چین لانا اور ای کامرس کے ذریعے عالمی خریداروں تک پہنچانا ہے۔

انہوں نے بتایا کہ اس وقت پاکستان سے پنک سالٹ، چائے، مشروبات سمیت مختلف مصنوعات نمائش میں موجود ہیں، تاہم دیگر ممالک کے مقابلے میں پاکستانی مصنوعات کی تعداد ابھی کم ہے۔

یہ بھی پڑھیں :چین کی جدید یونیورسٹی، پاکستانی طلباء کے روشن مستقبل کی ضمانت

حارث کے مطابق پاکستانی تاجر چین میں موجود سفارتخانے کے ذریعے رابطہ کر کے ریگولیٹری اتھارٹی سے لائسنس حاصل کر سکتے ہیں، تاہم اس عمل میں تقریباً 6 سے 8 ماہ کا وقت لگتا ہے۔

انہوں نے مزید بتایا کہ اس وقت چین میں پاکستانی ہربل شیمپو، ادویات، آم، چاول، زعفران، قدرتی تیل اور کھیلوں کے سامان کی بڑی مانگ موجود ہے۔

یہ بھی پڑھیں :چین کی نئی ٹیکنالوجی،کوئلے سے بجلی مگر آلودگی زیرو

پویلین میں موجود چینی حکام کا کہنا ہے کہ اس سلسلے میں پاکستان کے سفارتخانے سے مسلسل رابطہ رکھا جا رہا ہے اور جلد پاکستانی سفیر بھی اس پویلین کا دورہ کریں گے۔

پویلین کو پاکستانی پرچموں سے خوبصورتی کے ساتھ سجایا گیا ہے، جہاں پاکستانی وفد نے اپنے قومی پرچم کو دیکھ کر خوشی اور فخر کا اظہار کیا۔