ظہران ممدانی کا ارجنٹینا اور مصر کے میچ میں متنازع فیصلوں پر بڑا ردعمل، شائقین کے دل جیت لیے

امریکا کے شہر نیویارک کے معروف سیاسی رہنما اور میئر کے امیدوار ظہران ممدانی نے اپنی سیاسی مہم اور عوامی فلاح کے منصوبوں کے ساتھ ساتھ کھیلوں کی دنیا میں ہونے والی ناانصافیوں پر بھی آواز اٹھا دی ہے۔

انہوں نے ارجنٹینا اور مصر کے مابین کھیلے گئے حالیہ ہائی وولٹیج میچ میں ریفریز کے متنازع فیصلوں پر کڑی تنقید کی ہے۔

نئے ٹرانسپورٹ منصوبے کا اعلان اور عوامی سہولت

ظہران ممدانی نے اپنے نئے اور اہم منصوبے ’نیکسٹ اسٹاپ، بیٹر بسز، فاسٹر سروس‘ کے حوالے سے میڈیا سے تفصیلی گفتگو کی۔

اس موقع پر انہوں نے شہر کے ٹرانسپورٹ نظام میں جدت لانے کے عزم کا اظہار کرتے ہوئے کہا کہ بہتر اور تیز سفری سہولتیں عوام کا قیمتی وقت بچانے میں اہم کردار ادا کرتی ہیں۔ ان کا کہنا تھا کہ اس نئے منصوبے کی بدولت شہریوں کے روزمرہ سفر کا دورانیہ نمایاں طور پر کم ہو گا۔

یہ بھی پڑھیں:فیفا ورلڈ کپ 2026 پہلے سے فکس ارجنٹینا کے خلاف متنازع ریفری فیصلوں پر مصری کھلاڑی برہم

انہوں نے عوامی جذبات کی ترجمانی کرتے ہوئے مزید کہا کہ سفر کا دورانیہ کم ہونے کا سیدھا مطلب یہ ہے کہ شہری کام پر جانے سے قبل اپنی فیملی کے ساتھ سکون سے ناشتہ کر سکیں گے اور اسی طرح شام کو بھی وقت پر گھر واپس پہنچ کر اپنے بچوں کے ساتھ خوش گوار اور معیاری لمحات گزار سکیں گے۔

مصر کے ساتھ ناانصافی پر دو ٹوک مؤقف

اپنی پریس کانفرنس کو ایک انتہائی دلچسپ موڑ دیتے ہوئے ظہران ممدانی نے سفر سے بچنے والے وقت کی مثال کو فٹبال کے کھیل سے جوڑ دیا۔

Former amateur footballer and New York City Mayor Zohran Mamdani said Egypt was “robbed” again & again in its Round of 16 World Cup match against Argentina. pic.twitter.com/6QWmhEO4UF

— noʟᴀn (@krrishnolan) July 9, 2026

انہوں نے گفتگو کا اختتام کرتے ہوئے مسکراتے ہوئے کہا کہ وقت بچنے کا ایک مطلب یہ بھی ہے کہ آپ اپنے دوستوں کے ساتھ بیٹھ کر اس بات پر مکمل اتفاق کر سکیں گے کہ گزشتہ روز کا میچ مصر سے سراسر چھینا گیا ہے۔

ظہران ممدانی کے اس برجستہ اور بے ساختہ ردعمل نے میچ کے دوران ہونے والے متنازع فیصلوں کے بارے میں سوشل میڈیا پر پہلے سے جاری گرما گرم بحث کو مزید ہوا دے دی ہے۔

مزید پڑھیں:نیویارک کا پہلا مسلمان میئر بننے پر فخر محسوس کرتا ہوں،ظہران ممدانی کا عیدالاضحی پر پیغام

واضح رہے کہ ارجنٹینا کی مصر کے خلاف ایک ڈرامائی اور متنازع فتح کے بعد، مصر کی قومی ٹیم کے ہیڈ کوچ، کھلاڑیوں اور دنیا بھر کے شائقین کی جانب سے ریفریز کی مبینہ جانبداری پر شدید تنقید کا سلسلہ جاری ہے۔

حال ہی میں ارجنٹینا اور مصر کے درمیان کھیلا جانے والا یہ اہم میچ اپنے سنسنی خیز اختتام کے باعث عالمی میڈیا کی توجہ کا مرکز بنا ہوا ہے۔

میچ کے اہم ترین لمحات میں میچ آفیشلز کی جانب سے کچھ ایسے متنازع فیصلے دیے گئے جن کا سیدھا فائدہ ارجنٹینا کی ٹیم کو پہنچا اور مصر کو ایک یقینی فتح یا برابری سے محروم ہونا پڑا۔

میچ کے فوراً بعد مصری کوچ اور کھلاڑیوں نے اپنے انٹرویوز میں ان فیصلوں کو شرمناک اور جانبدارانہ قرار دیا تھا۔ دوسری جانب ظہران ممدانی، جو نیویارک کی سیاست میں ایک ابھرتا ہوا نام ہیں اور تارکین وطن کے حقوق کے لیے متحرک رہتے ہیں، ان کا یہ بیان دراصل عرب، افریقی اور انصاف پسند کھیلوں کے شائقین کے جذبات کی عین عکاسی کرتا ہے۔