حکو متی وزراء کی اپوزیشن رہنماؤں سے اہم ملاقات، برف پگھلنا شروع

حکومت اور اپوزیشن کے درمیان کافی عرصے بعد سیاسی رابطوں میں تیزی آ گئی، حکومتی وزراء نے اپوزیشن رہنماؤں سے ملاقات کی اور وزیراعظم شہباز شریف کی جانب سے اپوزیشن کے خط کے جواب پر مشاورت کی۔

مسلم لیگ ن کے رہنماؤں رانا ثناء اللہ، طارق فضل چوہدری اور وفاقی وزیر قانون اعظم نذیر تارڑ نے اپوزیشن چیمبر میں اپوزیشن لیڈر محمود خان اچکزئی سے ملاقات کی۔ سینیٹ میں اپوزیشن لیڈر راجا ناصر عباس بھی ملاقات میں شریک ہوئے۔

 یہ بھی پڑھیں :القادرٹرسٹ فیصلہ: حکومت اپوزیشن مذاکرات پر اثر کوئی نہیں پڑے گا، عرفان صدیقی

ملاقات کے بعد پارلیمنٹ ہاؤس میں گفتگو کرتے ہوئے رانا ثناء اللہ نے کہا کہ محمود خان اچکزئی نے وزیراعظم کو خط لکھا تھا وزیراعظم اس خط کا جواب دے رہے ہیں اور اسی معاملے پر مشاورت کے لیے اپوزیشن رہنماؤں سے ملاقات کی گئی۔

وفاقی وزیر طارق فضل چوہدری نے کہا کہ اپوزیشن کے ساتھ بات چیت آگے بڑھ سکتی ہے وزیراعظم شہباز شریف اپوزیشن کے خط کا جواب دیں گے۔ ان کے مطابق پیر کی ملاقات سے معاملہ آگے بڑھے گا۔

 یہ بھی پڑھیں :حکومت اور اپوزیشن کے غیر رسمی رابطے بے نتیجہ، پی ٹی آئی کے اندرونی اختلافات بڑی رکاوٹ بن گئے

انہوں نے کہا کہ بانی پی ٹی آئی عمران خان کی صحت پر کوئی سمجھوتا نہیں کیا جائے گا اور انہیں پہلے سے بہتر طبی سہولیات فراہم کی جائیں گی۔

نئے صوبوں کے حوالے سے طارق فضل چوہدری نے واضح کیا کہ حکومت کے پاس فی الحال نئے صوبوں سے متعلق کوئی تجویز موجود نہیں۔