فیفا ورلڈ کپ ٹرافی ٹور کا باقاعدہ اور شاندار آغاز سعودی عرب کے دارالحکومت ریاض سے کر دیا گیا ہے۔ 3 جنوری سے شروع ہونے والا یہ عالمی ٹور ریاض کو اپنے 75 بین الاقوامی اسٹاپس میں پہلا مقام بناتا ہے، جہاں فٹبال کے شائقین نے دنیا کی سب سے معتبر اور باوقار کھیلوں کی علامت، فیفا ورلڈ کپ کی اصل ٹرافی کا تاریخی اور پُرجوش استقبال کیا۔
ریاض ایئرپورٹ پر منعقدہ ایک پروقار تقریب میں فیفا لیجنڈ اور اطالوی فٹبال کے عظیم کھلاڑی الیساندرو ڈیل پیرو نے ٹرافی کی نقاب کشائی کی۔ وہ خصوصی طور پر فیفا ورلڈ کپ ٹرافی ٹور کے طیارے کے ذریعے سعودی عرب پہنچے۔ اس موقع پر سعودی عربین فٹبال فیڈریشن کے اعلیٰ حکام، سرکاری عہدیداران اور کھیلوں سے وابستہ ممتاز شخصیات نے ان کا پرتپاک استقبال کیا۔
تقریب کے دوران فٹبال کی عالمی مقبولیت، نوجوان نسل میں کھیلوں کے فروغ اور کھیل کے ذریعے مثبت سماجی اقدار کو اجاگر کرنے پر زور دیا گیا۔ مقررین کا کہنا تھا کہ ایسے عالمی ایونٹس نہ صرف کھیلوں کے فروغ میں اہم کردار ادا کرتے ہیں بلکہ مختلف ثقافتوں اور اقوام کے درمیان تعلقات کو بھی مضبوط بناتے ہیں۔
یہ فیفا ورلڈ کپ ٹرافی ٹور کا چھٹا ایڈیشن ہے جس کا مقصد 2026 میں کینیڈا، میکسیکو اور امریکا میں منعقد ہونے والے تاریخی فیفا ورلڈ کپ سے قبل دنیا بھر میں فٹبال کے جوش و جذبے کو مزید بڑھانا ہے، اس عالمی دورے کے دوران 30 فیفا ممبر ایسوسی ایشنز کو فیفا ورلڈ کپ کی اصل ٹرافی کی میزبانی کا اعزاز حاصل ہوگا۔
فیفا حکام کے مطابق یہ ٹور نہ صرف شائقین کو ٹرافی کے قریب لانے کا موقع فراہم کرے گا بلکہ آئندہ ورلڈ کپ کے حوالے سے عالمی سطح پر جوش و خروش پیدا کرنے میں بھی اہم کردار ادا کرے گا۔یہ عالمی ٹور ریاض کو اپنے 75 بین الاقوامی اسٹاپس میں پہلا مقام بناتا ہے،
By 
