لارڈ ٹیسٹ کا پہلا روز ، محمد عباس کی شاندار بولنگ ، انگلینڈ 9 وکٹ پر 248 رنز تک محدود

پاکستان اور انگلینڈ کے درمیان لارڈز میں جاری دوسرے ٹیسٹ میچ کے پہلے روز خراب موسم اور کم روشنی نے کھیل کو شدید متاثر کیا۔ بارش اور خراب روشنی کے باعث پہلے دن صرف 56 اوورز کا کھیل ممکن ہوسکا۔ دن کے اختتام پر انگلینڈ نے 9 وکٹوں کے نقصان پر 248 رنز بنا لیے تھے۔

پاکستان نے ٹاس جیت کر پہلے فیلڈنگ کا فیصلہ کیا تاہم میچ کا آغاز خراب موسم کے باعث مقررہ وقت پر نہ ہوسکا۔ کھیل شروع ہونے کے بعد پاکستانی فاسٹ بولرز نے انگلش بیٹنگ لائن کو مشکلات سے دوچار کردیا۔ محمد عباس نے شاندار بولنگ کرتے ہوئے انگلینڈ کے ابتدائی بیٹرز کو زیادہ دیر وکٹ پر ٹھہرنے کا موقع نہیں دیا۔

 یہ بھی پڑھیں :پاکستان کے خلاف ٹیسٹ اسکواڈ میں شامل انگلینڈ کے فاسٹ بولر کو گرفتاری کے بعدا ایک اور بڑا دھچکا

محمد عباس نے انگلینڈ کے مجموعی اسکور کو 36 رنز تک پہنچنے سے قبل ہی بین ڈکیٹ، ایمیلو گے اور تجربہ کار بیٹر جو روٹ کو پویلین واپس بھیج دیا۔ ابتدائی وکٹیں گرنے کے بعد میزبان ٹیم پر دباؤ بڑھ گیا تاہم بعد میں انگلینڈ کے بیٹرز نے صورتحال سنبھالنے کی کوشش کی۔

ہیری بروک بھی بڑی اننگز کھیلنے میں ناکام رہے۔ وہ 15 رنز بنانے کے بعد محمد علی کی گیند پر بولڈ ہوگئے۔ اس کے بعد جارڈن کاکس اور ڈین لارنس نے ذمہ دارانہ انداز میں بیٹنگ کرتے ہوئے ٹیم کا مجموعی اسکور 120 رنز تک پہنچایا۔

ڈین لارنس 17 رنز بنانے کے بعد رن آؤٹ ہوگئے۔ ان کے بعد جارڈن کاکس اور جیمی اسمتھ نے انگلش اننگز کو سہارا دیا اور دونوں بیٹرز کے درمیان 67 رنز کی اہم شراکت قائم ہوئی۔ اس شراکت نے میزبان ٹیم کو ایک مرتبہ پھر بہتر پوزیشن میں پہنچا دیا۔

جارڈن کاکس نے 55 رنز کی عمدہ اننگز کھیلی تاہم وہ سلمان علی آغا کے شاندار کیچ کا شکار ہوگئے۔ گیند سلپ کی جانب گئی تو سلمان علی آغا نے فوری طور پر ڈائیو لگاتے ہوئے ایک ہاتھ سے مشکل کیچ مکمل کیا۔ جیمی اسمتھ نے بھی اچھی بیٹنگ کرتے ہوئے 61 رنز بنائے اور انگلینڈ کے مجموعی اسکور میں اہم کردار ادا کیا۔

 یہ بھی پڑھیں :پاکستان کے خلاف ٹیسٹ اسکواڈ میں شامل انگلش فاسٹ بولر گرفتار

کھیل ختم کیے جانے کے وقت گس ایٹکنسن 34 رنز کے ساتھ کریز پر موجود تھے جبکہ جوش ٹنگ نے ایک رن بنا رکھا تھا۔ انگلینڈ نے 9 وکٹوں کے نقصان پر 248 رنز مکمل کیے تھے اور ایک وکٹ اب بھی باقی تھی۔

پاکستان کی جانب سے محمد عباس سب سے کامیاب بولر رہے۔ انہوں نے عمدہ لائن اور لینتھ کے ساتھ بولنگ کرتے ہوئے 4 اہم وکٹیں حاصل کیں۔ محمد علی نے 3 کھلاڑیوں کو آؤٹ کیا جبکہ خرم شہزاد کے حصے میں ایک وکٹ آئی۔

لارڈز ٹیسٹ کے پہلے روز وقفے وقفے سے ہونے والی بارش کے باعث کھیل کئی مرتبہ روکنا پڑا۔ بعد ازاں روشنی کی صورتحال بھی خراب ہوگئی جس کے باعث امپائرز نے مزید کھیل جاری رکھنا مناسب نہیں سمجھا۔ یوں پہلے روز مقررہ اوورز مکمل نہ ہوسکے اور انگلینڈ 248 رنز پر 9 وکٹیں گنوا کر دوسرے دن کا آغاز کرے گا۔