پاکستان ریلوے نے مسافروں پر بھاری جرمانے عائد کردیے

پاکستان ریلوے نے بغیر ٹکٹ سفر کرنے والے مسافروں کے خلاف بڑے آپریشن کے دوران860,740 روپے وصول کیے ہیں۔

تفصیلات کے مطابق پاکستان ریلوے کی جانب سے یہ کارروائی ڈپٹی چیف کمرشل مینیجر پیسنجر، ناصر نذیر کی جانب سے مسلسل جاری چیکنگ مہم کے بعد کی گئی۔

ریلوے حکام کے مطابق ہیڈکوارٹرز ٹکٹ لیس چیکنگ اسکواڈ نے نذیر کی نگرانی میں ملک بھر کی مختلف ٹرینوں پر اچانک معائنے کیے۔ ٹیموں نے345مسافروں کے خلاف کارروائی کی جو بغیر ٹکٹ سفر کرتے پکڑے گئے۔

آپریشن میں لاہور–ساہیوال، ساہیوال–خانیوال، لاہور–فیصل آباد، فیصل آباد–شورکوٹ، اور خانیوال–روہڑی کے اہم سیکشن شامل تھے۔

مزید پڑھیں: پاکستان ریلوے کا سردیوں کے ٹائم ٹیبل پر عملدرآمد عارضی طور پر معطل

حکام نے جن ٹرینوں پر چیکنگ کی ان میں علامہ اقبال ایکسپریس، تیزگام، خیبرمیل، عوام ایکسپریس، پاکستان ایکسپریس، شالیمار ایکسپریس، ملت ایکسپریس اور رحمان بابا ایکسپریس شامل ہیں۔

ناصر نذیر نے کہا کہ ریلوے کی آمدنی کے تحفظ اور کرایہ چوری کی روک تھام کے لیے یہ کریک ڈاؤن جاری رہے گا۔ انہوں نے مزید بتایا کہ یہ مہم وفاقی وزیر برائے ریلوے محمد حنیف عباسی، پاکستان ریلوے کے سی ای او عامر علی بلوچ اور چیف کمرشل مینیجر طارق انور سپرا کی ہدایات پر عمل کرتے ہوئے جاری ہے۔